ودعتــهـم .. امـوادع الـدم الــوريــده
ودعتــهــم .. .. قلـب يــدفــن حبــه بيــده
ودعتــهــم .. هاي مشـكلتي الوحيــده
ودعتـــهـم
_______
ابد ماچـان ابخيالي ادفن بديه...شمس كل يوم الصبح تطلع عليه
اشلون يرجعلي اليروح ابغير جيه...والله حيرة ادفن وجه ماليني ضيه
والله حيرة .. شلون ارد للدار وحدي
والله حيرة .. اترك اغله احباب عندي
والله حيرة ..واليروح اشلون اعيده
ودعتهم
_______
گمــت امر بترابهم واشتم عطرهم...واسأل اتراب الگــبر يومية عنهم
بعده لون الورد مرسوم ابوجهم...لوترابك ياگـبر غير شكلهم
رد عليه .. ياعلي التنشدني عنهه
رد عليه .. شرفت گــاعي ابدنهه
رد عليه ..روح اخذ ثار الشهيده
ودعتهم
______
باب خيبر وحدي جريته وقلعته...صار نصين وجسد مرحب شطرته
هِسه نص رغيف يابس ماكسرته...طاح سيفي وردت ارفعه مارفعته
لاتگــلي العين لوفگــدت بصرهه
لاتگــلي .. ايعود بالهين نظرهه
لاتگــلي ..ترجع ايامك سعيده
ودعتهم
______
همه العيون الأشوف الدنيه بيهه...والچــفوف الينتچــي الطايح عليهه
اشلون تعبر روحي الاحزان التجيهه...هيه جثة ابنص بحر ميتات اديهه
اني منهم .. گــمت ماشوف اليجيني
اني منهم .. شوف ماشبعانه عيني
اني منهم ..للحزن كل يوم أزيده
ودعتهم
______
انا ابوالحسنين هذا الماكو مثلي...بالحروب ايصير مثل الأسد شكلي
ودعت فاطم وابوها ومال حملي...الدمعة خافت تنزل وگلتــلهه نزلي
من اجلهم .. نزلت ادموعي اعله خدي
من اجلهم .. رجعت سيفي اعله غمدي
من اجلهم ..ماخذت حق الأريده
ودعتهم
_____
وحدي وايام الحزن كلهن لفني...والمصايب للمصايب سلمني
بعد مامحتاج تسأل غيري عني...ياعطر شايل حزن بي ريحة مني
حالة صعبة .. يا منام ايمر عليه
حالة صعبة .. واني دافنهم بديه
حالة صعبة ..وجوهم صارت بعيده
ودعتهم
______
حته ماگــالولي راح انروح عنك...أجمل ايام العمر ناخذهه منك
اتحضر الهن گالوا ايام اليجنك...وحدك ومحني الظهر واستفردنك
فارگــوني .. وابتدت بيه المواجع
فارگــوني .. اني الاول صرت رابع
فارگــوني ..انهتك ستر العقيده
ودعتهم
______
