وحشة دارك هالمسيه و مُظلمه...وانطفت شمعة حياتك فاطمه

 
مظلمه دارك يحماي الدخيل...حسرتك بالروح يا حيدر تعيل
ياللي منك ترجف الدنيه وتميل...اشلون دمعك سال يا حامي الحمه
 
سال دمعك من بعد فقد البتول...بهالمسه روحك يبو اليمه اشتقول
ضاقت الدنيه و قضت كل الحلول...بالقلب نيران حزنك مظلمه
 
مضرمه وبقلبك آهات وشجن...من تشوف اعيالك حسين وحسن
زينب الما ظن مصايبها قضن...ايعينك الله بهالمصاب ومقدمه
 
وحشه دارك ياللي عينك ما غفت...حيف شمعة بيتك الزهره طفت
غصه ما ظن بالأوصاف اتوصفت...رجف منها الكون و اهتز عالمه
 
رجف منها الكون من قد الحزن...بالأخص من صار بالسر الدفن
ليلك بنوح ومواجع من يجن...انت و اعيال الغدت متيتمه
 
بكل كتر ذكره إلك يا حيدره...ذكريات ادموع صارن عالجره
صعبه من قلبك يودع الطاهره...مو فقط للماي يشتد الضمه