يا فاقد أمك لا تظن...يتلاقه جفنك عالجفن
من شمعة أمك تنطفي...ما تنطفي اشموع الحزن
من غير أمك لا تظن تحله الحياة وتنسعد...واشلون تدخل بيت إذا ما بيه تشم ريحة ورد
أمك برد وكت الدفو أمك دفو بوكت البرد...ما دامها إقبالك تحس للدنيه توك منولد
لو ماتت ايموت الوفه...واتموت كل العاطفه
تخسر القلب العاطفي...ما تنطفي اشموع الحزن
مثل أمك الجرحك أبد محد يداوي لك جرح...واجناحك أمك من زمن تنوكل يالمالك جنح
شمسك و إذا غابت بعد ما تلمح اعيونك صبح...ملحت حياتك و العمر ماصخ يظل ابلا ملح
لو شيب راسك مشتعل...بعيونها اتشوفك طفل
كلما تشوفك تحتفي...ما تنطفي اشموع الحزن
شنهي الشعور البيه تمر لو شاهدت موقف صعب...واتشوف بابك يحترق و أمك إقبالك تنضرب
و اتشوفها اتون والضلع مكسور و المدمع يصب...وبكل صلافة و بلا خجل ينوخذ حقها و ينغصب
ينسب أبوها و ينشتم...و اتسبه أشباه الزلم
والثاني باهلك مشتفي...ما تنطفي اشموع الحزن
شيصير قلي بحالتك بالمقبره لمن تُمر...بس انت من دون البشر ما تلقه عند أمك قبر
و الأدهى من هاي وأشد واشلون تتحمل صبر...من ترجع البيتك تره ما تلقه أمك تنتظر
شتسوي وانت بهالوضع...باب اعله أمك يندفع
واتعوفك أم قلب الوفي...ما تنطفي اشموع الحزن
شيصير بيك ولوشفت باب اعله أمك ينطبگ...واتشوف أثر نار الحطب باطراف جفها المحترگ
واشلون عينك ما تهل و القلب خايف من يدگ...واتشوف كل جرة نفس أمك إقبالك تختنگ
يا ناس هذا اللي جره...ويه أمي لبوة حيدره
و الباري بيهم يصطفي...ما تنطفي اشموع الحزن
بعد أمي شفت الما يمر بعيونكم يهل البصر...ظهري بعمر خامس سنه وي كسر ضلع أمي انكسر
كل دمعه تنزل عالوجه مثل الجرح تترك أثر...لجل العليه ساهرت ذبّل ضوه اعيوني السهر
بعد أمي نزلت دمعتي...طفله وصرت أم لخوتي
و بأثر فاطم أقتفي...ما تنطفي اشموع الحزن
للأم مكانة و منزله يخسر تره الما يتعض...ربك الأول بالسمه و الثاني هيه اعله الأرض
و التعترضها بأي أمر يعني الإلهك تعترض...خمسه الفروض الواجبة طاعتها ذن سادس فرض
كل حب هواءٌ في شبك...بس حبها ظل جايم إلك
و الهالسبب من تختفي...ما تنطفي اشموع الحزن
يرجف جسمها ابلا برد لو مستك نسمة هوه...يعطش قلبها امن البجي و امن الدمع خدها ارتوه
يا ضوه البيت و لو مشت ما يرجع البيتك ضوه...سبحان رب اللي جعل طاعته و طاعتها سوه
أمك إذا ما شافتك...تركض تروح الصورتك
منك ابد ما تكتفي...ما تنطفي اشموع الحزن
