يا رب عليك بفاطمه...سجلني خادم فاطمه

يا ربي أقبل دعوتي و ازرقني هاي الخدمه...قلبي و رفيفه يناشدك من عدها لا لتحرمه
ينسام كل غالي بثمن و اشتره الغالي بدمه...و اعله الدرب صبح ومسه بشفافي ظلت كلمه
للزهره أرفع ونتي...تطفي جهنم دمعتي
يا ربي حسن الخاتمه...سجلني خادم فاطمه

لبس السواد و دمعتي لطم الصدر يكفيني...خليني يا رب العرش طول العمر خليني
أخدم بمنبر فاطمه بس فاطمه تنجيني...و انصب عزاها بالقبر لمن تغمض عيني
تقعد الموته وتستمع...لمن أون اعله الضلع
ناديتك ودمعي دمه...سجلني خادم فاطمه
 
يا كاشف الهم و الكرب حب فاطمه عنواني...لو ملت الناس الحزن آنا أستلذ بأحزاني
مستودع أسرار العلم يلهج بسمها إلساني...و الزهره قرآن الوفه متمسك بقرآني
هيبتها من هيبة نبي...غصبن على كل ناصبي
بفضلك يرب المرحمه...سجلني خادم فاطمه
*
كلما أصلي لك فرض خالص دعائي ورجواي...وي كل سجود أتوسلك حب فاطمه ايعيش اوياي
مجلسها يا رب العرش ما عندي غيره بدنياي...خدمتها بالنسبة إلي مثل الهوه و مثل الماي
من عندك العون ألتمس...يا خالق الجن والإنس
خدمتك روحي الهايمه...سجلني خادم فاطمه