رد شوف النبي يعقوب بقميص ابنه بسبب عطره...عسه بعطرك يبو صالح يتشافه الضلع كسره

يعقوب بمرد الشوف قلبه اليوسفه مفطور...بعث له بثوب بيه عطره ورد لعيون أبوه النور
و انت ما تدز عطرك مو تدري الضلع مكسور
يالمخلوق لجل الثار...أريد أذكر مصاب الدار
و أذكرك سيدي بيا نار
يا جرح اليروفه النوح جرح الباب يا كُبره

عله اجروح الحزن ناثر بهدير النايبه أنفاسك...عله أمك فاطمه جم ذوب انجرح يالغالي احساسك
عله ضلع الحبيبه صار أبيض كل شعر راسك
من الضلع حته اليوم...ما ضايق لذيذ النوم
مالومك يهالمالوم
الباب استوله بأحزانه عله قلبك غزه عُمره
  
عذراً لو جزيت الحد و أهيّج جرحك وهمك...لاجن ياوريث الثار أخبرك والخبر يمك
بإذنك ما سمعت اشلون طق يالمهدي ضلع أمك
و التترك بقلبي اصواب...قالوا ما عليها احجاب
بس لاذت وره هالباب
دفعها الما يخاف الله وقرر للصدر عصره

التجرح قلبك وتاذيك وتخلي الجروح اتون...بصدر أمك نبت مسمار و جرح الما بعد يسكن
أول ما عصرها الباب طاح اعله الثره محسن 
وسال اويه الطفل دمه...أسألك سيدي بهمه
ما صاحتك يا يمه
الما صاحت علي بالغوث ما نادتك لو مره

غوثك يا غياث الغوث ما يسوه الصبر دونك...اسمعتها اتنادي بالهادي دمعك سال بجفونك
لطم خد فاطمه بيده الظالم شافته اعيونك
من طلعت وره حيدر...سمعها ورد حليف الشر
بجفه سوه خدها أحمر
تتنخه بعلي و بالسوط قنفذ سكّت الزهره