ادركني يَبويه وجيب لي قطرة اميّه...رفرف على راسي ترى طير المنيّه

 يحسين ياللي من تمسك بيك ما خاب...يا مقصد الوافد وضنوة داحي الباب
أريد قطرة ماي قلبي من العطش ذاب...وغارت عيوني و اظلم الوادي عليّه

 غارت عيوني ونزف دمّي كثر الجراح...واتفطّرت يابوي جبدي والعزم راح
 خلّ الدّرع عنّي بهضني ثقل لسلاح...حر الشّمس ذوّب افّادي ياشفيّه

 لو تنطفي بقطرة اميّه نار قلبي...محّد كفو من هالجمع يوقف بدربي
برّد غليلي و عاين اطرادي و حربي...لحمل على الجيمان حمله هاشميّه

 واصرخ واخلّي الخيل تتْكَرْدَس على الخيل...وادعي النّهار من العجاج اظلم من الليل
 واملي الوادي امن الجثث واجري الدّما سيل...وافني العدا واترك مضاربهم خليّه

 ضمّه الصدره وصاح يبني والدّمع سال...إبشر يَعَقْلي جان منّي طلبتك مال
 و انجان قصدك ماي هذي طلبة محال...اللّي يجيب الماي ظل جسمه رميّه

قلها انفطر قلبي ومنّك طالب الماي...فَرّقِتْ صمصوم العدا وللجايزه جاي
والجايزه شربة اميّه تبّرد حشاي...تحسّر وقلّه ياضيا عيني اشبديّه

 ودّع خواتك والحريم وبالعجل روح...يسقيك أبوك المرتضى يامهجة الرّوح
 شبيدي يبويه وهالامر مكتوب باللوح...بالعَطَش كلنا ننْذبح بالغاضريّه