يَجاسم زفّتك ما هي هنيّه...برض الغاضريّه
عقب ذبح الشّبيبه الهاشميّه
يبني حوفتك حومة الميدان...و كل زفّافتك يالولد عدوان
فراشك رمل يا شمعة الشبّان...و شمع العرس يَبني النّبل و الزّان
و على راسك تهلهل خيل اميّه...برض الغاضريّه
طول الليل يبني اسهرت برباك...تنام النّاس و انا مساهره ويّاك
على قلبي يَحلو الطّبع محلاك...تعجبني يَبَعد اهلي مزاياك
يَنور العين ليش قطعت بيّه...برض الغاضريّه
يجاسم ما تراويني صوابك...شبيّب ما تهنّيت بشبابك
موزّع عمّك المظلوم جابك...فت قلبي يَبَعد اهلي مصابك
مبيتك وين قلّي بهالعشيّه...برض الغاضريّه
يقلها طبرة الهامه بهضتني...و سموم المعركه و العطَش فتني
اببّيض و سمر عدواني ولتني...طحت و الخيل بالحومه وطتني
اوصالي توزّعت فوق الوطيّه...برض الغاضريّه
أريد اوصيك قبل تفارقيني...سمعي وصيّتي و سمعي ونيني
الله يساعدك من تفقديني...منّي لو خلا البيت ذكريني
عمري ثلَثتعش ضقت المنيّه...برض الغاضريّه
هوت ويلي تشد طبرة جبينه...و شبح عينه و قصّر من ونينه
اشصار بحالها ذيك الحزينه...غدت تلطم على الهامه الحنونه
تقول اقعد و خل الموت ليّه...برض الغاضريّه
تقلّه اقعد يَجاسم يا ضيا العين...رحت فدوه يروحي العمّك حسين
تهنّى و نام يَبني بصفّ الاثنين...اخوانك يخلف الله و الخلَف وين
خلّوا الضّيم و اللوعات ليّه...برض الغاضريّه
أروحن باليسر و ارفج العدوان...لا عندي عشيره و لا لي اخوان
نبقى بهالخيم بس جيش نسوان...هذا حسين عمّك ماله اعوان
و اخوته مصرّعه سوده عليّه...برض الغاضريّه
و لَن زينب تقلها يا حزينه...قبل ما يقطع الجاسم ونينه
خلّيها تجي تودعه سكينه...تراهو غمّضت للموت عينه
شبل الحسن راح و هاي هيّه...برض الغاضريّه
إجت سكنه تجر الذّيل و تنوح...يمّه و هو يعالج طلعة الرّوح
بقت تنحب و تمسح دم الجروح...تقلّه وداعة الله للخلد روح
يجاسم صار عرس اقشر عليّه...برض الغاضريّه
