ملمّه و عملها الدّهر بيّه...راح الولد من بين ايديّه
و مصيبة الحلّت عليّه...زواج و عزيّة

قلّه ينور العين يحسين...جاسم ثمر قلبي وقع وين
باروح له و اخضب الكفّين...حنّاه عجنته بدمعة العين
وحيّد و لا خلاّه لي البين...قلها وقع و الرّاس نصّين
و الهيّج اللوعه عليّه...زواج و عزيّة

نادت و هي تلطم الهامه...وصلوني يم حلو الجهامه
للخيمة البيها اعمامه...و اصرخ على ذيك النّشامه
ياللي جفيتوا معَ السلامة...عد من تظل هاي اليتامى
ياهو العاين الهرّزيّه...زواج و عزيّة

هلّت دموع العين مسجوم...مثل الحمامه ظلّت تحوم
تنده يَجَاسم بالعجل قوم...للضّايعه و بَسّك من النّوم
مثل الكفن تفصيل الهدوم...ياليت منّي العُمر مَيدوم
حلّت عَلَي بالغاضريّه...زواج و عزيّة

قومي يَزينب يا حزينه...تلقّي الجاسم زافّينه
و من خيمته قشعي الزّينه...بالدّم تراهو مخضّبينه
و ما بين أُخُوته امّددينه...بهمّه ترى بطّل ونينه
شوفوا نصيبي اشقسم ليّه...زواج و عزيّة

دارن عليه يودّعنه...و لن الولد بطّل الونّه
و زينب تحل الدّرع عنّه...و تلحظ معاني الحسن منّه
و تصيح يا دهر المحنه...بفقد الشّباب الما تهنّه
الله يسكنه الهاشميّه...زواج و عزيّة