من دمك خضابك
من دمّك خضابك...من دمّك خضابك
بطّل ونّاتك...يَمّك عمّاتك
راويهن صوابك...من دمّك خضابك
يَبني يجاسم طبرتك راويني...بَغسلها يَوليدي ابمدامع عيني
جرحك ترى ابلب القلب كاويني...بطّل ونينك جاسم وحاكيني
مَنته العلامه...الحلو الجهامه
مهجة علي جابك...من دمّك خضابك
جاسم يَزينب رقبته عدليها...و بهداي دقّات القلب جسّيها
و هاي العصابه الطبرته شدّيها...غربت عينه و ونّته يخفيها
من تنظرينه...مبطّل ونينه
لابس كفن يَبني...من دمّك خضابك
قلها اصبري ولا تعايني احوالي...هاي المصايب و الهضايم تالي
ذكريني لو شفتي مكاني خالي...قالت يَروحي تعوفني بلا والي
ربّيتك يَبني...و هسّا تسيّبني
و شهالعرس يبني...من دمّك خضابك
جسّام لو مرّت عليّه الشبّان...هيجت حزني عليك يا غصن البان
عرّيس و منصّتك حر التّربان...و زفّافتك بالكون نشّاب وزان
و الغاضريّه...قشره عليّه
متوسّده ترابك...من دمّك خضابك
جسّام يا بدرٍ قبل ميحانه...صابه الخسف و تحجّب بتربانه
الحنّا الدّما و ثياب عرسه اكفانه...فت مهجتي ممدود بين اخوانه
يا نور عيوني...رحتوا و عفتوني
فت قلبي مصابك...من دمّك خضابك
جسّام قلبي بنومتك مزّعته...عشره و ثلاث العُمُر ما كمّلته
ربّيتك و ليل الشّتا ساهرته...لكن يَعَقلي ارباي ما ضيّعته
يَوليدي الزّهرا...محزونه و عبرا
باكر تجي اتشوفك...من دمّك خضابك
باكر يجيك المصطفى و داحي الباب...و ابوك يبني و دمع عينه سكّاب
ويّاهم اللي تسقّطت خلف الباب...و تجتمع يا ريع القلب الاحباب
يَبني وتشوفك...مخضوبه اكفوفك
و تعاينك عاري...من دمّك خضابك
