راح يَبن امّي جلدنا...و لا بقى صنديد عدنا
يا ضيا عيني أنشدك...وين زفّافة ولدنه

شاب ما وصّل بلوغه ليت اخويه الحسن شافه...و عاين بعينه عزيزه اللي حوى جملة اوصافه
وين ابو فاضل كفيلي ما حضر ساعة زفافه
شلون هالسّاعة تفوته...ما حضر ويّاه اخوته
هاي حزّات الشّبيبه الهاشميّه...وين زفّافة ولدنه

يا وسافه يصير عرسك و اخوتك كلهم ضحايا...يا ضوا عيوني و عمامك دارت عليها المنايا
وين شبّان الهواشم ما ينشرون الرّوايا
و يحضرون زفاف جاسم...بكَبكبه و ميل العمايم
بقت بس نسوه و يتامى بهالثنيّه...وين زفّافة ولدنه

ما ندَهت اشبال غالب ليش يا مهجة الزهره...ناسٍ تباشر زفافه ناسٍ يحفرون قبره
ما شفتها طول عمري هاي هالسّاعة القشره
ذبحته و عرسه بساعه...وين يَبن امّي الجماعه
شهَالمصيبه الحلّت عليك و عليّه...وين زفّافة ولدنه

قلها يا زينب ضحايا ولا بقى منهم شريده...اشحالة اليفقد يَزينب كل بني عمّه و عضيده
و انا حل وعدي يخويه و بعد ساعه انتي وحيده
لا كفيل و لا محامي...بكَربلا يرحم ايتامي
ذاب قلبي من نشدتي يا زكيّه...وين زفّافة ولدنه

تقلّه يا تالي الخمسه و يا ركن طود الإمامه...ما شفتنا شلون زفيناه نسوان و يتامه
وافقت لنّه يخويه من الحسن خيّي علامه
و هسّا يَبن امّي جنازه...ياهو يتصدّى الجهازه
تلوموني لو صحت يا راعي الحميه...وين زفّافة ولدنه

زفّة الجاسم ينور العين صارت بالمعاره...و خلعة زواجه اكفانه و النّبل خويه نثاره
و التغنّي له الهنادي يالولي و طيبه غباره
و بالدّما نخضب كفوفه...و بالدّمع نغسل زلوفه
هذا ترتيب العرس بالغاضريّه...وين زفّافة ولدنه

وين مسلم وين اخوته وين عون و وين جعفر...وين عبدالله بن مسلم وين عبّاس المشكّر
وين يَبن امّي محمّد ما حضر هاليوم الاقشر
يبو جاسم حيف فاتك...يوم اخوتك ذل خواتك
وين غايب تجذب الونّه خفيّه...وين زفّافة ولدنه