جينه انزورك مشّاية...القطع المنحر وفّاية
ما نتعذر مهما صار...شيعة حيدر حامي الجار
سبحانه رب القدره عظّم قدرك...محتارة أصحاب العقول بسرك
اشقد رادوا ايطيعون موضع قبرك...ضيعهم بنوره اليشع من نحرك
يا من نورك نور الله...حته الأعمه يندله
كعبة و بيها حج الأحرار...شيعة حيدر حامي الجار
من عالم الذر جان ساطع نورك...الله خلقنه و احنه جينه انزورك
آمنه بيك و نتبع دستورك...يضمن نجاته اللي يلوذ بسورك
قبرك مفزع للحاير...بيه تتلقه كل زاير
تهتف يا حي الزوار...شيعة حيدر حامي الجار
مشّاية و ادروب الخطر نمشيها...لجلك دمانه تبلا ثمن نفديها
محلاها دنيه بخدمتك نقضيها...تضوي الصحيفه اليسطع اسمك بيها
المات بدربك هنياله...حبك أفضل أعماله
متعنية بهمه و إصرار...شيعة حيدر حامي الجار
قطع الجفوف و جنه هم نتعنه...نادينه قطع الراس لا ميهمنه
احنه الذبح مولاي ما رجعّنه...بيعه ووفه بدم النحر وقعنه
و العادونه ايسمعونه...لو بمحبتك قطعونه
غيرك قائد ما نختار...شيعة حيدر حامي الجار
اجنون العشق دوب اقلوب أحبابك...نطوي المسافات و نجي الأعتابك
ننسه التعب لمن نشم اترابك...آمنه باب الجنه عتبة بابك
و اللي يدخل بالجنه...يطلب كلما يتمنه
طبعك تتلقه الخطار...شيعة حيدر حامي الجار
يحسين فزعة شيعتك مشهودة...أصبح إسمهم للكرم إنشوده
شيعه و حزمها الخدمتك مشدوده...من الفاو للطف سفرتك ممدوده
شوق و لهفة ابكل موكب...اتحيي الزاير و ترحب
حياهم ولد الكرار...شيعة حيدر حامي الجار
