يا مجير ابلا إجاره...بارك بهاي الزياره
يا من شرفت زوار الحسين...بارك لليزور الكاظميين
إلهي الزار موسه الكاظم اترفعه...ملك يستقبله و من يطلع ايودعه
عليك أقسم إلهي بدمعة البضعه...مثل ما جبته سالم سالم اترجعه
يا غفور اغفر ذنوبه...يا سميع استر عيوبه
يا رب تحفظه بجاه الجوادين...بارك لليزور الكاظميين
كلمن زار موسه بشده لتعوفه...و بعين التشوف الكاظم اتشوفه
إجه الباب الكريم اليكرم اضيوفه...سائل يا إلهي و مد لك اجفوفه
معتني الموسه ابنَ جعفر...يرتوي من اجفوفه كوثر
يالجاعل شمس بغداد شمسين...بارك لليزور الكاظميين
يا هو العدنه غيره انروح نشكيله...يستاهل أسد بغداد نمشي له
هذا العلجسر محد رضه ايشيله...محد غسّله و محد يصلي له
وينه هارون و غروره...وينه ديباجه و قصوره
وين أهل الظلم يا رب صفو وين...بارك لليزور الكاظميين
يا من صّبرت موسه بسجن هارون...صبر كل سجين ابلا ذنب مسجون
كون الفارقونه اويانه يتلاقون...و يحل الفرج و الغابوا ايرجعون
و الغريب اتفض غربته...و البجه اتعوض دمعته
يا الما لك شريك و لا شريكين...بارك لليزور الكاظميين
أصحاب الحوائج كلها تقضيها...يا من تنطي بيدك بيدك انطيها
تدگ بيبان غيرك لا تخليها...و التشكي العلل بدواك شافيها
و الدعه اتقبل دعاءه...و المريض اكتب شفاءه
تمشي اگلوب إجت ما تمشي رجلين...بارك لليزور الكاظميين
يم موسه ابن جعفر صار موعدنه...و الرد الشمس ما واحد ايردنه
نشكي من الظلمنه و الوقف ضدنه...غدرنه و استغل غياب قائدنه
ندعي عجّل في ظهوره...صاحب النفس الغيوره
هذا النذر النصرتك دين...بارك لليزور الكاظميين
تدري الفقد غالي تكثر آلامه...و لا عدنه علي اليحتار بيتامه
كثره بهالزمن يا ربنه ظلامه...عاف البعض دينه و يعبد أصنامه
دعوه يا رب البرية...من رحاب الكاظمية
لا ترحم إلهي اليحجي وجهين...بارك لليزور الكاظميين
إلهي بجاه سبط المصطفه المذبوح...إرحم كل شهيد و شافي كل مجروح
كل أم كل أخت يا رب تون و اتنوحل...جل الراح منها اعله الجنان اتروح
عوض الفگدت ضناها...من هواه تشتم هواها
يا رب لا تفارگ كل حبيبين...بارك لليزور الكاظميين
