يبني اعيوني الجانت ترسم زفة و حنه و ياس
صاحت لمن شافت طولك بالحافر ينداس
روحي روحي...راحت يمه اوياك
روحي روحي...ما تحمل فرقاك

جنت أحلم و بليلة عرسك من يردون اشموع
صينيتك من قد الفرحة أشعل بيها اضلوع
لحظة و صارت كل أحلامي نار و هم و ادموع
أمك وين اتودي الحنه جف ايدك مقطوع
من قد الخوف البعيوني من هاي الأحلام
جم ليل الفات و ما تقبل بيها اعيوني اتنام
عيني عيني...ما تقدر تنساك
عيني عيني...ما تحمل فرقاك

يا نسمه و جنت آنا أشتمك بين أنفاس الروح
من أسمع كلمة يا يمه تشفه اشقد اجروح
لو رايد تهجرني احجيلي أمك وين اتروح
بيمن تغفه و تحلم عيني يا حلمي المذبوح
جرحي و دمعي و نار اوداعك لو سمعن طاريك
يرتاحن يبني و يتبسمن من انسولف بيك
ناري ناري...أطفيها بطرواك
ناري ناري...ما تحمل فرقاك

ظليت أشتم عطر اثيابك يوليدي من أشتاق
و اعيوني اتباوع لرسومك بيهن لون افراق
كون الله اشكبره و بغيابك يبني اعله أمك ضاق
جف الموت بيوم الباقك كلشي بروحي انباق
ظليت أرسملك بدموعي و احساسي المهدوم
صورة عريس ابلا زفه حنة عرسه ادموم
رايح رايح...ييمه الله اوياك
رايح رايح...و شيحمل فرقاك

يمه الواساني اعله اغيابك يوم الدمك سال
ضحيت و صارت ضحيتك مضرب للأمثال
أجيال اتعلم مدرستك و اتخرج أجيال
ميخافون الحفظوا درسك و يهدون أجيال
مثلك يوليدي اعله المصرع يمشون الشبان
راحوا للموت برجليهم جن زفة عرسان
ناسك ناسك...من تعطش تنخاك
ناسك ناسك...ما تحمل فرقاك

يبني الصّبرني اعله اجروحي و طفه بروحي النار
يم الزهرة اسمي اتسجل ما بين الأنصار
و اتقلي ابنج ويه اولادي نفس الدم و الثار
لو ما وقفتهم بالحومة جان الدين انهار
و أدري بيوم المحشر يبني تشفع لي الزهرا
و أدري حسين بوجه الظالم يعشق كلمة لا
راسي راسي...مرفوع آني اوياك
راسي راسي...ما تحمل فرقاك