يا بالفضل أدريك...همة علي اتباريك...يا شمعة اسنيني
و المرضع ايناديك...بحسين أرد أوصيك...يا شمعة اسنيني
شمل الغوالب مجتمع...و جمر الوداع ابكل ضلع
و أم البنين الطاهرة صاحت يعباس استمع
همتك همة والدك حيدر أصل و انت الفرع
عندي وصية يولدي مكتوبة بحروف الدمع
هاي الوصية اتقول...ما غيرك المسئول...أمك و تدريني
صار اعتمادي اعليك...بحسين أرد أوصيك...يا شمعة اسنيني
يوليدي هاي القافلة...أطفال بيها و عايلة
و حسين أخوك ابهالضعن عازم يروح الكربله
آنا أمك ومنك ردت ضعن الأهل تتكفله
و هاي العقيلة أم الخدر هودجها بيدك عدله
أم الخدر بحماك...للطف تروح اوياك...آنا أدري توفيني
و الأمل بالله و بيك...بحسين أرد أوصيك...يا شمعة اسنيني
آه يبني يا موح القلب...راشدة النية ابهالدرب
عالعيلة لو طال السفر و لو صرتوا يوليدي بغرب
لتخلي زينب بت علي تشعر يعباس برعب
هذي وديعة فاطمه و المهجر اعليها صعب
يبني و يبحر الزود...حفظ العهد مريود...ما بينك و بيني
خل عهدك ايجاريك...بحسين أرد أوصيك...يا شمعة اسنيني
وياك يا بحر الشيم...جودك و سيفك و العلم
لو وصل للطف الضعن احسب و فكر بالهمم
يوليدي أول مرحلة انصب مخيم للحرم
و لا تبتعد عنها أبد و لتفارق احدود الخيم
يا وارث الكرار...منك أريد أخبار...بالفخر تلفيني
و قلب أمك يوافيك...بحسين أرد أوصيك...يا شمعة اسنيني
عباس نور الأربعة...للعهد حاشه اتضيعه
و حسين لو حس بالعطش روح بعجل للمشرعه
ما يهم جفك ينقطع و جسمك يطيح بمصرعه
خل أفتخر عد فاطمه بجفوفك المتقطعة
لو صوبوا عيناك...يا قمر هاشم هاك...وياك إخذ عيني
و العلقمي ايتانيك...بحسين أرد أوصيك...يا شمعة اسنيني
عباس يا ريع الجبد...مو سهلة مني تنفقد
لاجن أوضح لك خبر ابهالخبر يبني أعتقد
أربعة و بيكم أفتدي ابدمكم أضحي و أستعد
ما يهم لو دمكم نزل و حسين سالم خل يرد
ريحانة المختار...لو ما يرد للدار...هالخبر ياذيني
خل صبرك ايواسيك...بحسين أرد أوصيك...يا شمعة اسنيني
يوليدي و أرويلك خبر...بيه تشهد أسياد البشر
يوم القيامة فاطمه ترفع اجفوفك يا قمر
و اتصيح ليش اتقطعن ليش انرمن يم النهر
و آنا اعله بنها أنتحب و أصرخ يمحزوز النحر
و الزهرة ذاك الحين...تنحب عله الجفين...و توقف تواسيني
و حيدر يجي ايهنيك...بحسين أرد أوصيك...يا شمعة اسنيني
