اشجايب هدية اليوم جدك محمد
أمك تصب ادموع...و للزفة جاب اشموع...جدك محمد

صورة زفافك بين فرحة و آلام...هالدهر صورها
فرسان غالب حوفة نصبوا بخيام...ايفرحك منظرها
يا هو التنشده ايقول زفة جسام...جنه نتنطرها
لن جدك المختار حاضر زفافك...يا شمعة الشبان بالحوفة شافك
و شاف الشمل مجموع...و للزفة جاب اشموع...جدك محمد

عند الغوالب هذي ليلة أفراح...و زفتك تعلنها
و ابتشرت بفرحة زفافك أرواح...و اتبدد حزنها
بس رمله أمك تبجي و المدمع ساح...و الدهر دوهنها
و تتمثلك و اتشوف شمعة شبابك...اتهيم بهضمها و نار جمرة مصابك
و تبجي بقلب مفجوع...و للزفة جاب اشموع...جدك محمد

اسمع قلب رمله يجسام اشقال...يا مسرة عيدي
يبن الحسن هيّجت نار الدلال...زفتك يوليدي
و أدري يجاسم تالي جف الآجال...ياخذك من ايدي
و تجري الدمع و اتنوح بالخيمة يمك...و تتخيلك مذبوح و الحنه دمك
و صار الجفن ينبوع...و للزفة جاب اشموع...جدك محمد

رمله ابقلب بيها الحزن ظل مكبوت...و بعالم فكرها
جن تسمع من الحسن يتوجه صوت...و الحسن يخبرها
يا رمله ابنج باجر اسيوف الموت...الجثته اتوذرها
و عالمعركه ايزفوه و جسمه ايتوذر...و حيدر أبوه اوياه و للزفه يحضر
و ينظر نحر مقطوع...و للزفة جاب اشموع...جدك محمد

و آنا يرمله من بداية عمره...وصيته بوصيه
لو شاف عمه اوحيد ابني اينصره...و يتقدم ضحيه
حان الوعد واجب يقدم نحره...لسيوف المنية
و آنا الحسن ظليت أترجه يومه...و الزهرة أمي اوياي تنطر قدومه
و أمر الأبو مسموع...و للزفة جاب اشموع...جدك محمد

يبن الحسن و أمك يجاسم مرسوم...عهدك يالحفظته
و جدك محمد حاضر اوياك اليوم...و يشارك عترته
ايشاهد اهلالك باجر اتزفه انجوم...و بعرسك فرحته
و جدك حضر و يريد بسمك يبارك...و بزفتك عالموت جدك يشارك
و صوت النبي مرفوع...و للزفة جاب اشموع...جدك محمد

للمعركة يبن الحسن حين اتروح...ما يتركك جدك
و لو طحت فوق الأرض و الدم مسفوح...ايحط خده اعله خدك
و لو شاف يا جاسم وريدك مذبوح...يحفر بيده لحدك
و هاي الحرب و القوم رفعوا هنادي...و بالمعركة ايحاميك جدك الهادي
و قلب النبي مفجوع...و للزفة جاب اشموع...جدك محمد