شمعة شبابك يبني طفوها...وسط القلب هالليلة علقوها
قوم احسب آلامي...يا فرحة أيامي...شمعة شبابك يبني طفوها

يبني غذيتك ابدمعتي التجري...و اسهرت لجلك و ابذلت عمري
ابروحي هزيتك و المهد صدري
يوليدي اقعد و اغفه بجروحي...قلبي اليهزك و المهد روحي
يالمنذبح ضامي...يا فرحة أيامي...شمعة شبابك يبني طفوها

يبني لجل ارباك ضاعت اسنيني...و غصنك اسقيته من دمع عيني
تالي دهري حال بينك و بيني
هالحالة ما جانت عله بالي...جسمك أشوفه امقطع إقبالي
فوق الترب دامي...يا فرحة أيامي...شمعة شبابك يبني طفوها

يبني يا جاسم يالعشت بالروح...ابصوتي ناديتك و القلب مجروح
يا وسف شفتك عالترب مذبوح...ابقطعة وريدك ذبحوا أفراحي
و انطفت يبن الحسن مصباحي
و انذبحت أحلامي...يا فرحة أيامي...شمعة شبابك يبني طفوها

حسبت يبني أفرح بعرسك...و ما دريت اتغيب ابكربله شمسك
و يا وسف فاضت للأجل نفسك
يا نور عيني الغاب عن عيني...و خليني أجري المدمع خليني
دمع الجفن هامي...يا فرحة أيامي...شمعة شبابك يبني طفوها

جنت أحسب بيك تحضر الدفني...ما جنت أدري تنذبح يبني
انعكست أحلامي و الدهر ذبني
يبني يجاسم تاهت أفكاري...صوبت روحي و هيجت ناري
منصرع جدامي...يا فرحة أيامي...شمعة شبابك يبني طفوها