ناديتك بدموع العين...يا بويه يا بويه
بالعايلة قاصد وين...يا بويه يا بويه
وحدي تخليني

آنا العليلة ابقلبي المنفجع...أصرخ و أنادي و المدمع يهل
تتركني وحدي بوية ابهالوضع...و الفرقة صعبة لا ما تنحمل
بالسفر وياك تاخذ هالجمع...و تحمل اضعونك جم طفلة و طفل
و بس آنا جا ليش أبقه أهمل دمع...يهلي و تقطعون ويايه الوصل
و من ترتحل عني الوطن...تتركني بالهم و المحن
و لو سدد اسهامه الزمن...ما أظن يلتم الشمل
وحدي أظل بهالدار...يا بويه يا بويه
و ما توصل منكم أخبار...يا بويه يا بويه
وحدي تخليني

طفلة و عليلة تعرف حالتي...و من يباريني لو راحوا هلي
اويه العيلة خذني وي ضعن أخوتي...و ظليت اعيش وحدي بمنزلي
ارحمني بويه و ارحم دمعتي...و تدري بعدكم شيسد خلتي
و أبقه غريبة و صعبة غربتي...لا اخوه يمي و اترد وحشتي
افراق الأهل تدري صعب...و يا ذلة العاشق ضُرب
اعيوني تظل اعله الدرب...و تهمل اعليكم دمعتي
ما أقدر أحمل فرقاك...يا بويه يا بويه
لتخليني و خذني اوياك...يا بويه يا بويه
وحدي تخليني

و الطفل ينذل لو راحوا هله...يا هو اليصبره و يمسح دمعته
و امن الأحبة موحش منزله...بعد الأطايب تكبر وحشته
اليا كتر ناوين هاي القافلة...و هالسفر جم يوم تصبح مدته
قلها يبوية قاصد كربله...و كأني أشوفه ايصبر طفلته
ودعها و المدمع جره...و الطفلة شمت منحره
و ضعن الأهل للطف سره...ابدمعة حزن من ودعته
بهذا السفر من اتروح...يا بويه يا بويه
تفجع دليلي المجروح...يا بويه يا بويه
وحدي تخليني

شيفيد العتاب لو أعتب بعد...و ناوين كلكم يهلي اعله السفر
آنا بعدكم اوقع بالشدد...و ما أدري يهلي اشيخلف لي الدهر
اشيحمل الفرقه لو طال الوعد...و انتوا مشيتوا بدروب الخطر
و مشبوحة عيني ظلت عالمهد...و القلب داوي بنيران القهر
عبدالله روحي و سلوتي...هذا اليرد لي وحشتي
و بعده جرت دم معتي...و عودت عيني اعله السهر
عبدالله وياكم من راح...يا بويه يا بويه
و انفجع دلالي و صاح...يا بويه يا بويه
وحدي تخليني

وصاها الحسين و المدمع يصب...عالمحن لازم تلتزمي الصبر
افراقج علينه مو هين صعب...لا لا تظنين يسهل هالأمر
و سفرتنه صعبة و ابعيد الدرب...و انتي عليلة و نارج تستعر
و حين اللي تخلص ونتج...و من تشفه لوعة علتج
واحد أودي من اخوتج...و تنقضي ساعات العسر
اتقله يا صعبها فرقاك...يا بويه يا بويه
و ما أظن أبداً ألقاك...يا بويه يا بويه

وحدي تخليني

أيام مرت ما أدري اشجره...وما أدري بيكم يا أهلي اشحصل
و المرض ذبني و آنا امحيرة...و لا خبر منكم لا طارش وصل
و غمضت عيناي و لا واحد دره...و باللي جرالي ما واحد سأل
و نار المصيبة بروحي اموجرة...و الأجل قرب من بعد الأهل
ابحجر المنية اتمددت...يا بويه يا بويه
و بالونة و بالحسرة صحت...يا بويه يا بويه
ووحدي تخليني