كربله لو كلها ماي...و الله ما تروي ضماي
كل مره ضحت ابنها امن الثواكل...و الرباب اتصد لبنها بوجه خاجل
قلت زحمه و للحرب لازم أواصل...حجه جان الماي حته أطلع و أقاتل
و آنا أدري الكلمة هاي...و الله ما تروي ضماي
لا فتى إلا أنا بالطف نشيدي...راح أرجع ثار جسام و عضيدي
زلمة صاير حرمله و يوصل وريدي...و علي ما أرجع إذا مو راسه بيدي
لو تجي الدنية وراي...و الله ما تروي ضماي
القال عني اصغير ما يعرف مقامي...آنا رايح للنهر أنصر إمامي
لا يظل قلبج رقية اعليه دامي...راح أجيب النهر يم الخيمة ضامي
لو بحر تنزف دماي...و الله ما تروي ضماي
عمي كافل زينب و بس وحده هية...و آنا كافل سِكنِتي و كافل رقية
ما كو شارب حته ألزمنه بيديه...راح أدب اقماطي و أركض عالمنية
المشرعة اتصير بقفاي...و الله ما تروي ضماي
عيسه صارت معجزه اتكلم بمهده...و آنا ويه الموت راح أقعد له قعده
الكوفة راح أحرقها كلها بنظرة وحده...و آنا جيش الشام لرض الشام أرده
بالسهم راسي بسباي...و الله ما تروي ضماي
آنا شخصيتي عجيبة احتارت الناس...من بعد عباس أصيرن ثاني عباس
عمري ست اشهور بس مو هذا مقياس...لجل زينب شاب قلبي و شيّب الراس
أرفع اقماطي لواي...و الله ما تروي ضماي
