باجر...سجّلها بيدك كلمة الوفّاية
باجر...إلا نسد عين الشمس بالراية
يا بو علي و سبعينك...بالحومة قرة عينك
إلا نسد عين الشمس بالراية
باجر عله إرقاب الزلم يوصل نفر لخيامك...و انظر عله السبعين ألف نذبحها تحت أجدامك
بينه انتفض و اغزي الأرض أنصارك و خدامك...صح الأخو احزام الظهر اسمح نصير احزامك
لجلك...بثلاثة طلقنة النسه و دنيانه
لجلك...نقلبها و الزهرة اعله بن مرجانة
خلينه تحت ايمينك...بالحومة قرة عينك
إلا نسد عين الشمس بالراية
يا بو علي جيش العدو مو كثرة من انعدهم...هُمَ سبعين ألف بس كل وفة ما عندهم
احسبنه كل واحد بألف حتماً نصير بقدهم...قادتنة انت و القمر هم الشمر قائدهم
حيدر...لو صحنه و الله انزلزل المعمورة
حيدر...شبه الزلم باجر تذل مجبورة
جربنه مترجينك...بالحومة قرة عينك
إلا نسد عين الشمس بالراية
يمته يطر فجر الحرب للملتقه اشتاقينه...جنة و حواري تنتظر يا مرحبه اتنادينه
عفنه الأهل عفنه الوطن موت الشرف شارينه...من تدوي نيران الحرب انخانه و افرح بينه
عابس...من يزعل و يجدح جمر بعيونه
عابس...يمزق قميصه و يعترف بجنونه
آمرنه منتظرينك...بالحومة قرة عينك
إلا نسد عين الشمس بالراية
باجر إذا شفنه إبرهه بالحومه راكب فيله...إحنه أبابيل السمه نمطر حجر سجيله
تتراكض اخيول و زلم و الما ركض يا ويله...و اليدعي بيها يجي و الما يجي نمشي له
جفه...لهفة حبيب او ينزف المحبوبه
زفة...و انت اليحبك يشرق من اغروبه
و اعيونك امكفينك...بالحومة قرة عينك
إلا نسد عين الشمس بالراية
يا سيدي عندنه طلب جفك نريد انبوسه...ردنه نهوس بالفرح يم زينب المحروسة
بلغها يا بن حيدرة بس يمها تحله الهوسة...هوستنه وفايه نظل و اليوصل إلها اندوسه
زينب...يعرفنه حيدر و اخوتج دراية
زينب...ما كو مثلنه اعله الأرض وفاية
و حسينج موصينك...بالحومة قرة عينك
إلا نسد عين الشمس بالراية
جون و عوسجة و برير و الهمداني...نافع وهب و الشاكري أنصاري و الشيباني
باجر تسابق حيدري كلمن يقلك آني...و اليوقع أول ينتظر لمن يوصي الثاني
يوصي...ها خوتي ها لحد يعوف حسيني
يوصي...قلولي إبشر حته أغمض عيني
قولوا وفيت بدينك...بالحومة قرة عينك
إلا نسد عين الشمس بالراية
خل ينبني طف كربله دولة ضماير حره...باجر ملايين البشر تتنومس ابهالثورة
عاشر محرم عالوعد كلمن يقدم نحره...و الما يكفيه اللطم رد اعله راسه ايطبره
غاية...من يلزم السيف و بده بتطبيره
غاية...قصده يقلهم هذا دم الغيرة
بالحضرة منتظرينك...بالحومة قرة عينك
إلا نسد عين الشمس بالراية
باجر مثل عابس تجي الطف كربله أحبابك...بيهم جنون الشاكري بيهم عشق لترابك
كلمن يجي لابس جفن و يسجل اسمه ببابك...احنه بحضورك نوفي لك هم وفوا بغيابك
شيعة...رايتنه عدهم هية نفس الراية
شيعة...تطوي الصحاري و توصلك مشاية
بالموزمة امكفينك...بالحومة قرة عينك
إلا نسد عين الشمس بالراية
