قرروا هاي المسية...يلتقي العالي بعليه
طلب منه لقاءه...راح حيدر
عرج لله بدماءه...راح حيدر
إلهك نّزلك و اهواية الأسباب...نعم هيئة بشر بس نازل اكتاب
خلقنه من ترابك و انت أبو اتراب...إذا ما نزلك من يقلع الباب
إجيت بنهج قدسي ترفضه الأعراب...العدالة ما تناسب طبع الذياب
وجهك الكله إبتسامه...حقها تهواك اليتامة
يتيم أسمع بكاءه...راح حيدر
عرج لله بدماءه...راح حيدر
دروس انطيت للعالم كثيرة...القصور اتزول بس تبقه الحصيرة
بزمانك حدثت القصة الشهيرة...الفقيرة شبعت و جاعت أميرة
فقط انت اليشيل اهموم غيره...لجن شتسوي للبايع ضميره
يا بشر سواها غيرك...جايع و تشبع أسيرك
نطق من خذ جزاءه...راح حيدر
عرج لله بدماءه...راح حيدر
إجيت المله ما عرفوا مقامك...عقلهم يزغر و يكبر كلامك
فقط يصغون من يحجي حسامك...شطارة عندهم الشردة أمامك
ارفعت روس المسلمين بقيامك...جزاءك يا علي مطبورة هامك
صدر الباري بيانه...حيدر ايعود المكانه
نصب ربه عزاءه...راح حيدر
عرج لله بدماءه...راح حيدر
علي يا قدرة الباري و جماله...يسيفه و رايته و حامي الرسالة
عليك اليعله سبحانه و تعاله...يقطعه السيف جف الله استحاله
تره لولا تقول الناس غاله...قلت شُبه لهم واحد بداله
قالع الباب اشيقلعه...يا قدر يقدر يصرعه
وحي صاح بسماءه...راح حيدر
عرج لله بدماءه...راح حيدر
شلت دنية و عوالم فوق صدرك...صفه عش اليتامة فوق ظهرك
تشوف الباطن بعين الينظرك...ابن ملجم غفه و ناوي يغدرك
تقعده ليش و اتعرفه يطبرك...ردت وكت السجود اتسلم أمرك
حته جتالك سمعته...يا علي ناده بطبرته
بجت سورة براءة...راح حيدر
عرج لله بدماءه...راح حيدر
حنوطك من ابن عمك ذخرته...منيتك قربت و انت طلبته
خذت حصه و عفت للحسن حصته...عجيبة حسينك الغالي تركته
شبكته و جن شفت بالطف ذبحته...صحت يوليدي و اتبوسه برقبته
ينقطع يالغالي نحرك...تلعب الخيل اعله صدرك
شمر يعله نداءه...راح حيدر
عرج لله بدماءه...راح حيدر
إجتك زينب و ثنّت اركبها...بوجها اتبسمت قد ما تحبها
تخاف اعليها يتصدع قلبها...تعال و شوف حيرتها بغربها
واحد يشتم وواحد ضربها...هذاك اليحرق و ذاك السلبها
ريتك اتشاهد متنها...و الشمر يحدي بضعنها
حجه و كله إساءة...راح حيدر
عرج لله بدماءه...راح حيدر
