وياك إخذني بوية لو رايد اتروح...من راحت الوديعة زينب بلا روح
قوم إلنه بالسلامة...لا تبقه مجروح...لا تبقه مجروح
أنا زينب يبو الحملة اجيتك و أعثر بهمي...دجاوبني الجرح جتال أمشي اعليك ضلع أمي
شفت جرحك رجف قلبي يا بويه نشف دمي...أجي يمك أشم صدرك لو انت تجي يمي
اشرايد زماني مني بسهمه رماني...ليش انت تمشي عني و العيد إجاني
حيدر يبو اليتامه...لا تبقه مجروح...لا تبقه مجروح
يالهامك عله اعله الغيم يا سيف الذي يطبره...بعد من يمسح ادموعي و قلب الفاقد ايصبره
إذا ناوي السفر أوصيك سلم لي عله الزهره...تشوف الضلع يا كرار بعدهي اتلوج من كسره
جرح الزجية يصعب جرحك هضيمة...قلها العقيلة زينب صارت يتيمه
فقد الأبو ندامه...لا تبقه مجروح...لا تبقه مجروح
حسن يحسين اخبروني لا تخفون عني الحال...أبونه بيه امل يشفه لو هذا الجرح جتال
بغيابك يداحي الباب يا ريت العمر ما طال...بلا حيدر نعيش اشلون قولوا لي الطبيب اشقال
ما يشفه جرحه حيدر أيس طبيبه...لون الوجه تغير ها يالحبيبه
جرح جرح كرامة...لا تبقه مجروح...لا تبقه مجروح
يبوية التفقد الوالد تره حقها تهبط الراس...و ادموع اليتم بالعيد تعرفها يبو الاحساس
نعم طبع الأبو خيمة هذا اللي تقوله الناس...سمعها و صاح نادوا لي أريده يحضر العباس
هاي الأمانة عندك تلزمها بيدك...و انت التوافي وعدك للطف أريدك
بالدمعة و ابتسامة...لا تبقه مجروح...لا تبقه مجروح
أريد اتنشف المدمع عله مهلك توديني...تريد اعيوني تشبع شوف يمن رايد تضيعني
أضمد جرحك بجرحي و أسولف و انت تسمعني...وحق عينك إذا ترحل أبد هالدنية ما تعني
كلشي إجه اعله بالي كلشي حسبته...اخذ العمر يغالي بس تبقه انته
ليلك صعب أنامه...لا تبقه مجروح...لا تبقه مجروح
أشاهد بيدك الكافور هذا امن النبي مذخور...و انطيت الحسن منه عجب و حسين ما مذكور
تقله اتراب يوم الطف يبو اليمه إلك كافور...يوم الينقتل عباس و انت اموذر و منحور
زينب بعد خدرها ترحل سبية...عالمشرعة نظرها بالغاضرية
ياذي الشمر كلامه...لا تبقه مجروح...لا تبقه مجروح
و لو للعيد ظل اوياي حته ايصير آخر عيد...ريتك يا علي وياي كلشي امن الزمن ما ريد
تريد اتروح من عيني و أظل أصفق الأيد بإيد...يسقف البيت من اتطيح يا في التقول ايفيد
خل تفرح الأعادي زينب حزينة...من طبرة المرادي رايح ولينه
شهرك جرح صيامه...لا تبقه مجروح...لا تبقه مجروح
