شيعتك ننخاك...ابهمنه نترجاك

دلينه يا بو حسين...ادفنت الوديعة وين

يحيدر شيعة و باِسمك تفاخرنه...عله الفطرة عشقناك بمحبتنه

يهيبتنه و شرف جوهر عقيدتنه...سره حبك يفارس خيبر بدمنه

كل محب واساك...يا علي و عزّاك

صاح بدموع العين...ادفنت الوديعة وين

الزجية و بالغدر من حان مصرعها...اطلعت بالظلمة يا حيدر تشيعها

حنيت اضلوعك بلوعة و تودعها...عله فرقاها عينك تجري مدمعها

بقلبك المجروح...عالوديعة اتنوح

لمن لفاها البين...ادفنت الوديعة وين

عزية قلبك بصبرك تجفنها...بظلام الليل بيدك تالي تدفنها

ادفنت وياها يا بو الحملة محسنها...وسدته اعله صدر أمه و هدء ونها

حضنته بهمها...نيمته يمها

من هاجن الضلعين...ادفنت الوديعة وين

بونينك تقضي و بهمك سهر ليلك...عله امصاب الزجية اتهدمت حيلك

إلمن تشتكي و منهو اليشكي لك...عنك راحت الجانت تباري لك

من هضم حزنك...ما بطل ونك

ابدمعك يبو الحسنين...ادفنت الوديعة وين

جسد بنت النبي بالظلمة واريته...السبب معروف لمن يا علي اخفيته

عن الأنظار محد يدري خليته...أثر موضع قبرها و سره ضميته

يمته يا كرار...تكشف الأشرار

يا والد الطيبين...ادفنت الوديعة وين

يحيدر حقنه لمن نحجي و انعاتب...نوجه لك سؤال احنه بقلب ذايب

يظل قبر الوديعة لش وكت غايب...نواظرنه القبرها ظلت اتراقب

بدمعة المهموم...ننشد الهاليوم

ظلينه محتارين...ادفنت الوديعة وين

يمن صبرك جزه حته الصبر أيوب...اصبرت لمن شفت طلع الطهر مصيوب

لون غيرك دليله امن المصاب ايذوب...لجن عزمك صبر عالقسمه و المكتوب

بشانك و قدرك...جسّدت صبرك

ياللي ادحرت صفين...ادفنت الوديعة وين