يا موت إجيتك من وكت...و اعذرني خاف اتأخرت

لجروحي كلما ألتفت...أتوادع اويامن حرت

من عقب أبوية اتأملت لو طوّل غيابه...يتجازه بحبابه...مو يندفع بابه

يا موت منك ما خفت...بس آنا مجروحه...و الينسمع نوحه...أحلامه مذبوحه

الدنية كل هذا العمر...ما دخلت ابعيني...شتظنها تعنيني...من تخلص اسنيني

عن قصتي ايطول الشرح...و اثمنطعش عمر الجرح

للفرقة من اتحضرت...أتوادع اويامن حرت

الأم إذا عافت طفل جفها يظل خالي...و آنا انشغل بالي...يا موت بطفالي

بس لا طفل غافي و صحه مو يمه يلقاني...مو سهلة ينساني...ظل قاعد امتاني

يا هو اليغطيه لو بُرد يا هوه اللي يضمه...من نومته اتحرمه...من ما يشوف أمه

لطفالي يا موت أرد أصد...خليني أشوفنهم و أرد

تدريني لمن سافرت...أتوادع اويامن حرت

تمطر عله اتراب القبر دمعات أحس بيها...ما عرف راعيها...يا هوه باجيها

و اسأل منو الفوق القبر يا هوه خطاري...اليبجي و يداري...و اليعرف بناري

خطّار أحس بونته من بجّت الموتة...و بعبرة اسكوته...ما فرزنت صوته

بإذن اللحد يهمس إلي...يا فاطمه آنا علي

بسما سمعني اتحسرت...أتوادع اويامن حرت

شخبار بيتي و لا عرف وي فرقتي اشلونه...قدروا يصبرونه...عن دمعة اعيونه

عند أهلي هم بعده الحزن يبتدي من غبشة...الوادعوا نعشه...عدهم ترك وحشة

عالزاد من اتجمعوا يا موت ذكروني...مو سهلة ينسوني...لو قدروا بدوني

بلكت نسو طعم الحزن...يا موت أريد آنا اطمئن

اعزاز بفقدهم دمعّت...أتوادع اويامن حرت

آنا أحمد الله من رحت ما خذت حق واحد...حقي خذه الحاقد...الله عليّ شاهد

و استحملت كسر الضلع و الباب و العصرة...لجل النبي و أمره...أتحمل السطرة

آنا اللي ما قلت العلي بالحسرة و الهضمة...ما قلت له عن خصمه...من خوفي عالأمة

ما ردت وني ينسمع...لا يعرف بكسر الضلع

بالآلام روحي اتصّبرت...أتوادع اويامن حرت

أم بيت يا موت و ردت لولادي أرد ليلة...واحد أناغيله...و الثاني ألولي له

مدري منو السد خلتي و اتحقق امنيتي...و اتحامي ذريتي...من تدخل البيتي

عندي أمل لمن تجي و اتحقق امرادي...التذكر ابعادي...و التحفظ أولادي

متأكدة و عندي علم...نتشابه بنفس الإسم

مطمئنة لكن من رحت...أتوادع اويامن حرت

ثار التراب البلقبر أرحم لي من عمري...بيه آخرة صبري...بيه جنتي و ستري

بيبان ما بيه تندفع أو واحد ايحرگه...صاحب هله و ملگه...و يقّدر الرفگة

اتراب و يخاطبني بأدب لو شاف دمعاتي...و يقلي مولاتي...تفداج ذرّاتي

من سولفت هل اشكثر...دمع التراب البلقبر

هل دمع عينه من قلت...أتوادع اويامن حرت