إجت سكنه تصيح الله أكبر...يبويه ليش هالنوما ابها الحر

تصيح ابصوت يفجع من يسمعه * يفت گلبه و يرض صدره او ضلعه
يفيض كل عدو اعليه دمعه * يبويه ليش هالنومه ابهالحر

يبويه ليش ما تنغر عليه * مني سكنه العزيزه الهاشميه
يبويا اسا عدوي شمت بيه * ذليله ايشوفني ما بين عسكر

يبويا الروح كل احنا فداياك * دخدني للگبر يحسين و ياك
أهي غيبه يبويا و اگعد أتناك * و گولن سافر و يومين يسدر

يبويا اللي وگع من بين ايديه * چتل عطشان ما تشرب اميه
يبويه ريت هالنومه هنيه * او من بعدك يريت الناس تسهر

على امصابك يبويه لصب دمعي * و خلي اعليك نوح الليل طبعي
لحرم ما يجيس الگاع ضلعي * و لا گلبي بعد فرگاك يستر

يبويا گول لا تخفي عليه * هذي روحتك لو بعد جيه
يبويا انچان رايح هاي هيه * إخذني اوياك عنك ما اگدر أصبر

يبويه من شفت مهرك لفاني * ذاب الگلب و انخطفت ألواني
يبويه ايعود لي بيكم زماني * و شوف الدهر بيكم يرد يزهر

يبويا باد حيلي و حگ جدك * عسن للگاع خدي دون خدك
يبويا شاب راس الدين بعدك * و الدنيا أظلمت و الكون مغبر

بچت زينب او صدت للمدينه * يهلنا احسينكم گطعوا وتينه
أشو نومتكم صارت ضنينه * د گوموا يال هاشم و الهضم مر