من يصيبك سهم...ارتضي بالقضه
ما تحس بالألم...لو رحت للرضه
و الله تخلص حاجتك...انوي و احجي بدمعتك
هالدمع لوله هالدمع ما نشوف ابتسامة
لوله آل المصطفه ما عرفنه الكرامة
عترته خادمهم ملك و بجبينه علامة
و القصد باب الله نجه ما يحس بندامة
صير رافضي...صير و ارتضي
ويه ثامن قمر ظلمتك تنجلي
ما تحس بالخطر لو صحت يا علي
اصغي و صفي نيتك...انوي و احجي بدمعتك
سيد الغربة و أصبحت حاكم اعله البرية
كل بني آدم تنتفي إلا ولد الزجية
و الرضه سلطان الدهر دولته هاشمية
يا بني هارون السجن ما يذل حيدرية
هاي شيعته...هاي حضرته
ما يدوم الملك و النسل ينقطع
إلا حب الوصي للحشر بيه نفع
ساعة و تخلص دنيتك...انوي و احجي بدمعتك
شمسه ما غابت أبد و الحقد ماحجبها
يا علي و اسمك من علي كلمة ربك يحبها
بالأمس طوس ابلا طوه هسه يلمع ذهبها
و الحسن سيد كل حسب و انت سيد نسبها
دوم يا علم...دوم عالقمم
انت راية علي عالقمم تنرفع
انت صوت النبي و الوتر و الشفع
مأوه و الكل قصدتك...انوي و احجي بدمعتك
لو زرت سُرَ من رأى دمعتك مهدوية
للبقيع انت من تون ونتك فاطمية
من أرض طوس الطاهرة ابجي للغاضرية
من تجي الوادي كربله حسرتك زينبية
ليش يا دهر...ليش هالقهر
كل بلد بيه أثر من جبد فاطمه
لا يطيب الجرح لا يجف الدمه
واسي الزهرة ابونتك...انوي و احجي بدمعتك
لو ردت تنصر فاطمه ابدمعك ايخف حزنها
تشعر بهم الوالدة من تفارق ابنها
دمعة الأم اعله الابن حمرة تجرح جفنها
مشهد و يثرب نينوه ما عرفنه وطنها
آه جم بلد...آه بيه ولد
تنصب إلهم عزه للطم تستعد
لكن ابيا قبر فاطمه تنوجد
اخلص توفي غايتك...انوي و احجي بدمعتك
الرضه الراضي بالقضه الليلة ودع غربته
شابحة اعيونه عالدرب لا أهل لا صحبته
نظرته نظرات الغرب إلمن اتصد نظرته
كربله ابعينه كربله همها يجري بدمعته
عاش بالحزن...عاش ممتحن
لو ذكر عمّته زينب الميسره
تنسمع ونته ينجرح ناظره
زينب مصدر علتك...انوي و احجي بدمعتك
ننتظر أعلام الفرح حته ننسه ألمها
من يسل سيفه الهاشمي الناصبية ايهزمها
يرجع الحق الحيدرة و السقيفة ايهدمها
دولة الحق القائمة بيده يرفع علمها
وين رايته...وين طلعته
عجل الله الفرج نندعي كل فرض
يمته قسط و عدل تمتلي هالأرض
شيعي و أدعي الطلعتك...انوي و احجي بدمعتك
