عليك الطف يخويه اينوح رمله...و هذي رمله بعدي اتصير رمله

اخذها الكربله يحسين رمله...مثل زينب يقودها سبيه

تاه الفكر مالي علم ونتاه...يون قلبي تعال استمع ونتاه

عليه حسين تجري الدمع ونتاه...تظل ابلا دفن بالغاضريه

غصنك عالشهادة كبر ونته...و لجلك يالحسن هالقلب ونته

حسين اعله التراب ايطيح و انت...شهيد اتجرعت سم المنيه

أثر سيفك ترك ما ترك بعداك...و عن طفك زمان الغدر بعداك

زينب يالحسن من غبت بعداك...أسيرة و بالحبل تنقاد هيه

يخويه اشما اصبر الروح ونها...عليك ايزود يا مظلوم ونها

أقول أمك ابهذا الحال وينها...تقابلني عله النوح الزجيه

أنوح و لا تقلي بعد عني...عله امصاب الحسن يحسين عني

يخويه لا تضم الطشت عني...طشت راسك أشد و أصعب عليه