هالنوح يا زهرا على منهو تنوحين...نوحك على المسموم لو نوحك احسين
حنّت اُونادت والدمع بالخد بادي...ان تسألوني يا خلق كلهم اُولادي
لكن مصاب اِحسين ساطي في افادي...كُل العزا والنوح والصيحه على احسين
ابكي على اُولادي فنوا بالسيف والسم...وابكي على بوهم قتيل لابن ملجم
وانكان بالله تسئلوني ياهو اعظم...كُل المصايب هونتها امصيبة احسين
دهري رماني بالرزايا ابكل غالي...اُوشتت اُولادي عن يميني اُوعن شمالي
ما شوف ساعة فارغ امن النوح بالي...واعظم عليّه لو نعى الناعي على احسين
أبكي على اُولادي ذبايح يوم عاشور...وانا نصبت العزا ليهم وسط لقبور
وانسيت ضلعي اللي ابصير الباب مكسور...كُل العزا والنوح والصيحه على احسين
إذا ابتليت ابمعضلة اُوشقّيت جيبك...اِذكر حبيب المصطفى تنسى حبيبك
اُولو من ذكرت امصيبته الله يثيبك...وسفه قضى مذبوح ماحد غمض العين
إمصابي نحلني اُوهيّج أحزاني عليّه...ورّث عليّه امصاب يوم الغاضريّه
راسه مشوا به اُوجثّته ظلّت رميّه...ظلّت ثلاث بالعرى من غير تكفين
والله ماشتت اُولادي في البريّه...واسقاهم الغصات اُوكاسات المنيّه
إلاّ الذي هم قبل دخلوا عليّه...اُولحوا عليّه بالضرب واسقطوا للجنين
ولا بلد إلاّ اُوفيها منهم اقبور...اُوليّه اِبغداد المشومة منطفي نور
وابني علي في طوس قلبه انشطر باشطور...واللي نحلني يا خلايق ذبحة احسين
اُولا تحسبوني للرضا في طوس ماجيت...ولا إلى بغداد مارحت اُوتعنيت
كلهم عليهم نوحت والجيب شقيت...واعظم عليّه لو ذكرت امصيبة احسين
واحد ابطوس امغرب اُوواحد ابغداد...اُومنهم ابسامرا اُوعني كلهم ابعاد
واما عندي إلاّ من سقوه السم في زاد...اُو عندي قبر باقي البقيّة اِخليفة احسين
