شـالوا الـجنازه و وصّـل ابن الحنفيّه...و شـاف المصيبه اقبال عينه و الرزيّه

فـاض الـبقيع و فاضت ابرور المدينه...و اشـبال حـيدر بـالوقار و بـالسّكينه
طـلعوا مـن الـمسجد بـخوهم شايلينه...و فـرّت ابـضجتها الـحريم الـهاشميّه

مـن شـاف هـالحاله ترجّل عن نجيبه...ومـن شـافهم كـلهم هـواشم شق جيبه
و شـاف الـشّهيد حسين و اتعلّى نحيبه...و نـاداه خـبّرني ابـعجل يَـبن الزّجيّه

يـحسين خـبّرني عَـلَي دنـياي وحشه...كـلكم حـريم و زلـم فـرّيتوا ابدهشه
و ويـن الحسن لَيكون هذا النّعش نعشه...وصارت الضجّه وغابت الشّمس المضيّه

قـلّه نـعم هـذا الحسن عزنا و ضمدنا...و هـالدّار ورث امـنا و بيها قبر جدنا
وبـيها الاجـانب تـندفن واحنا انطردنا...وانــا يـخويه مـقيّد بـقيد الـوصيّه

حـن وجـذب حسره وصب الدّمع سجّام...ويـلاه مـن شـمتة عـدونا اُوجور لَيّام
بـاجر بـشاير ياعضيدي توصل الشّام...وتـفرح هـند والـحزن سـهم الفاطميّه

حـطّوا الـنّعش ويـلاه ياساعة القشره...مـن نـزّلوا مـهجة الزّهرا وسط قبره
وحـسين دنّـق وانـتحب والعين عبرى...يـقلّه يـخويه وداعـة الله هـاي هـيّه

وهـالوا تـراب الـقبر وانهدّت اركانه...و روّوا اتـراب الـقبر بالمجمع اخوانه
و شـمّامة الـهادي الـذي وجّر احزانه...رجـعـة الـبيت وشـوفته داره خـليّه