يجري دمع النظر...ويه جاري النهر

بالماي أشوفن صورتك...بويه

علي زين العباد و آية التقوه...إله ابجده الرسول المصطفه أُسوه

يواجه بالصبر كل معضلة و بلوه...يصيح آنا البقيت ابلا أبو و إخوة

شنسه من الزمن...و الله قلبي امتحن

ذبحوا حياتي بذبحتك...بويه

مواقف بالدرب مرت عليّ صعبة...سبي و نوح الثكالة و همي و الغربة

يعذبني العطش و الماي ما أشربه...يذكرني بأبويه الملتهب قلبه

عذري منك صحت...مسبي عنك رحت

منهو اليباري عيلتك...بويه

أعاتب كل نهر بيه ماي لو أشوفه...و أنشده اعله الغيور القطعوا اجفوفه

و أخبره اعله الفرات الباع معروفة...و لا بّرد لهيب اقلوب ملهوفة

جم قلب مستعر...للعطش بيه جمر

و الأشد جمرة جبدتك...بويه

يحل وعد الأجل يا ما تمنيته...جزع ما عندي بس صبري تعّديته

أنا الشدة مصابي عمري مليته...أبويه اعله اللحد بجفوفي خليته

جسمه ما بيه كتر...سالم من الطبر

ناديته تصعب دفنتك...بويه

عليّ من الجروح الأشد شماتي...أجاوب كل سؤال بألم آهاتي

و العيون التصد لوجوه عماتي...سبب دمعي اليسيل و نار حسراتي

من تميل الهزل...خوفي يوقع طفل

طحت بمصيبة بطيحتك...بويه

عله اعيوني المصيبة الظلت مأثرة...أقول اشلون قلبي ما نفذ صبره

رسول الله على ثغرك يحط ثغره...و يضربه بخيزرانة الظالم بغدره

بويه لمن شفت...راسك البلطشت

و الأثر بعده بجبهتك...بويه

بعد ليل الخرابة الخيّم بنوحه...دليلي وي رقية فزت اجروحه

إجت ليه بحزن و ادموع مسفوحة...إخذني الوالدي لو جان إلك روحه

شافتك بالحلم...ما درت باليتم

حاير شجاوب طفلتك...بويه

هلي الخلصوا ذبح عافوني الوحدي...صحت غير الدموع اشظل بعد عندي

و التبين بغضها الحيدرة جدي...بغض و أحقاد بلسم قطعت جبدي

من فقدت الأهل...خل يحل الأجل

عمري ظلام بغيبتك...بويه