قلوبٌ دامية
«مجرشه مذيله»
(لطم)
من كربله إو ذبحتهـا...لو زينب إو غربتها
من دنياك ما تهجع...گلبك تگطع
* * *
ليش الرمى ابگلبك كثر...من الـدهر واخطاره...اوگطع دليلك
والسگط منك عالنهر...للخدر هدم داره...وانهدم حيلك
اوعالمشرعه حني الظهر...ظلت ابگلبك ناره...اوما نمت ليلك
والمصيوب يتروع...من دهـره يجزع
وانته الصبر عنوانك...والحلم عظّم شانك
هالخلاك ما تجزع...گلبك تگطع
***
واشلون من رد المهر...من المعاره امترب...يسحب إلجـامه
گلبك تجلد بالصبر...من شفت وجهه امخضب...ابدم الإمامه
چتفك بحبال اليسر...واعرفت ابوك امصوب...والدم علامه
وانته اتلوج واتنازع...والجفن دامع
واتحيرت بطفـالك...وانفجع گلب اعيالك
والمفجوع ما يهجع...گلبك تگطع
* * *
وانته على افراش الولم...مرمي اوتجـود ابروحك...اوتخفي ونينك
اوكلما يصيبوك ابسهم...وايفيض دم اجروحك...اويثگل حنينك
والجمر من حرگ الخيم...يظهر سنانه ابنوحك...الله يعينك
هذا الصـاب دلالك...وانمرد حالك
او طبـرات جسم الأكبر...نار ابدليلك تسعر
وابهالنـار تتلوع...گلبك تگطع
* * *
شيصير گلبك شيحمل...وايصد مرامي دهره...اوهمك يچيدك
اولو شفت عريس اتهمل...عينك وتجذب حسره...او يتلوه جيدك
وابمنحرك سهم الطفل...ماضي اوتگص الشفره...وانحز وريدك
او طيب النـوم حرمته...اوليلك سهرته
والزاد ضارب عنه...روحك سلتها الونه
اومن المـاي تتمنع...گلبك تگطع
* * *
أدري يبو الباقر شفت...من الدهر چم لوعه...واتحملتها
والخيل لمن شاهدت...رضت لبوك اضلوعه...ابعينك شفتها
وابسهم البگلبه انصبت...والروحك المفجوعه...من صبرتها
كثره اسهـام صابنـّك...حيل اوجعنك
وروحـك من اليرمونك...تتفايض من اعيونك
ويه حسين بالمصـرع...گلبك تگطع
* * *
ما شاهدت عينك رغد...لامهجتك مرتاحه...والله اشمصيبه
اودلالك ابسم انمرد...والسم گطع سباحه...وجرلهيبه
بالدنيه وافاك الوعد...بالجنه شوف الراحه...بالله او حبيبه
وايجـازيك معبودك...ينعش وجودك
من دهرك الما أنصف...واشحمل گلبك بالطف
واشمر بيـه واتجرع...گلبك تگطع
* * *
