مصائب العليل عليه السلام
« «شيعتي»»
(گعده)
سهم النايبه صوّب دليلي من الغاضريه
يـوم اليسّرونه...للكوفه سبونه
من الغاضريه
* * *
طحت بشراك النوايب والنوايب صوبني
إصواب ما لدواه چاره ومن حياتي إنگطع ظني
إسبوطعش حامل رساله بالطفوف إنذبح مني
وآنه عله إفراش ألألم...مطروح وإبگلبي السهم
ومن صـاحن إبوجهي الحرم...إمردن چبدي إو ذوبني
ومن نامو هلي إبحجر الشهاده...وجمعو من التربان الوساده
والعسكر ولونه...للكوفه وسبونه
من الغاضريه
* * *
إنصبت من الشاطي حربه رمح وإصوابي ضهدني
وأهجس إبراسي العمود الصاب أبو فاضل إو هدني
عينت چبدي الشريعه إو سهم المحدد وردني
روحي إطفحت للمشرعه...وشفت الچفوف إمگطعه
وشاهدت عمي إو مصرعه...منمرد حاله ومردني
ودمعة والدي وحنية إضلوعه...لساعه بعدها إبگلبي لوعه
وبالطـف ضيعونه...للكوفه سبونه
من الغاضريه
* * *
هاك يالباقر تسلم من حريج الخيم جمره
وإكتب إبدمعك وصيتي وإحيي للإسلام أمره
مثل ما جدك حياه إبدم رضيعه إو فيض نحره
والحال إبوك إتمثله...وإسا تشاهد كربله
وإتشوف أهلنه إمچتله...إو شوف خيالة العشره
سحگت خيلها إصدور الهواشم...ومن غارت عله إخدور الفواطم
يبني إو فرهدونه...للكوفه سبونه
من الغاضريه
* * *
ريت حاضر بالمعاره وتنظر إشراح إمن أهلنه
چم طفل سحگته الخيل وچم شباب إلما تهنه
وشوف عرّيس الهواشم جاسم إبدمه تحنه
طفينه بالحسره الشمع...ولن رمله محنيه الضـلع
صاحت إبگلبٍ منفجع...يولدي إو تجذب الونه
يبني إو شِعْملو عسكر الكوفه...إو جاسم بالدمه حنـَّو إچفوفه
إبدمه خضبونه...للكوفه سبونه
من الغاضريه
* * *
يولدي إو ريتك تشاهد كربله إو مصرع ألأكبر
من أثر طبرة ألأزدي من ظهر مهره تكور
هلّه هلّه إشلون طيحه طاح بموسط العسكر
وإتولته إبطعن إو طبر...إبيض الهنادي والسمر
إو خله إبضمايرنه الجمر...مثل حرگ الخيـم يسعر
حرگ إخيامنه إو ذبح...زلمنه ما اثر مثل سبيت حرمنه
يبني إو لوعونه...للكوفه سبونه
من الغاضريه
* * *
عله إفراش ألألم مرمي إو للأجل شابحه إعيوني
إشما يمر مچتول بيّه عله القبله إيمددوني
دارو إمتوني إبسلاسل وإبظهر ناگه إشبگوني
وساگي إنجرح بالسلسله...وماردني سبي العايله
ومن تصد عيني الحرمله...أهجس إبحربه رموني
آ يا حرمله إو رمية إسهامه...إبچبد الطفل وإبچبدي علامه
يبني إو ما رعونه...للكوفه سبونه
من الغاضريه
* * *
يبني كل هاي المصايب شاهدتها أو رگد حيلي
إو من عگب هاي النوايب فطّرو بالسم دليلي
دگرب إگرب يا عزيزي إو خل أگظّي إوياك ليلي
لا تظل عينك هامله...ولا تفجع الديـن أو هله
وبالصبر گلبك جمّله...إمودع ألله يا خليلي
يبني لو دنت ساعة وفاتي...إبنورك تنعلگ شمعة حيـاتي
إو گوم الشتتونه...للكوفه سبونه
من الغاضريه
* * *
