طـلعت تـجر ذيـل الحزن وقت العشيّه...ومـرّت عـلى فسطاط أبوسكنه الشجيّه

هـلّت دمـوع الـعين لمّن شافت حسين...مـحتار جـالس والـمدامع على الخدّين
مـتصوّر الـفقد اخـوته وهتك النّساوين...يـتلهّف ويـعتب عـلى الـدّنيا الـدّنيه

اخـتنقت بعبرتها ومشت والدّمع مذروف...ومـرّت عـلى خيمة كفيل ايتامها تشوف
لـنّ البطل عبّاس جالس واخوته وقوف...مـثل الـبدر مـن حـوله نجوم المضيّه

وقـدّام عـينه مـفرّعه حـيود ونـشامه...و الـكل بـيده مـهنّده ومصغي الكلامه
قَـلْهم يـفرسان الـذي يـود الـسلامه...ابـهالليل يـمشي و اتركوا الزّحمه عليه

وكِـلْمَنْ يـهاب الـموت منكم يا شياهين...يـترك هـالمخيّم بصدري و هالنّساوين
وانـا واخوتي نروح فدوه العِزْنَه حسين...بـاجر أصـيح بصوت حي على المنيّه

نـفسي بـجنب المشرعه تحضى بسعدها...أَوْعَـدِتْ بـنت المرتضى وباجر وعدها
اعـزيزه و جـبِتْها بذمّتي من حرم جدها...و هـلّت ادمـوعه و انقطع باجي حجيّه

واكـبر عـلي ثـار وجـذب سيفه وسلّه...وحـطّه عـلى جتفه و الشّعر بالحال فلّه
واحـنى عـلى عـمّه يحب راسه ويقلّه...تـشوف الـفعل قـدّام عـينك يـا شفيّه

والله يـعمّي لـو تجي رخصه من حسين...وحـياة أبـوك المرتضى فارس الكونين
لحمل على العسكر واخلي الجيش شطرين...قـبل الـفجر تـبقى مـضاربهم خـليّه

قـلّه يـنور الـعين بـاجر عينك تشوف ...جنب الشّريعه بصولتي شَفْعَل بالصفوف
جـان القضا ساعد وسلمت لي هلجفوف...لـترك أهـل كـوفان كـل بيت بعزيّه

كـلّه لـجل زيـنب تـراهي ذوّبـتني...شـافت الـجيش وبقت تنحب وشْعبَتْني
تـشبع مـذلّه مـن الـعدا جـان فقدتني...تـنصب نـياحتها عـلى حـسين وعليّه