يالراهب ابرسمه...لا ترسمه ابدمه
و إذا ما تعرف امصابه...اسأله و اسمع اجوابه...لا ترسمه ابدمه
رأس الحسين اويه الضعن يمشي بمساره...لمن وصل يم معبد و دير النصاره
مثل البدر و من الرمح دمه ايتجاره...و الراهب اتعجب منو هالليلة زاره
راس السبط زارك...استقبله بدارك
و إذا ما تعلم اشجابه...اسأله و اسمع اجوابه...لا ترسمه ابدمه
لمن أخذ راس السبط و بجفه شاله...قرر يصوره الراهب و يرسم جماله
ابماي الورد غسّل نحر دامي و حجاله...سبحانه خالق صورتك جلَّ جلاله
من تبدي باللوحه...لا ترسم اجروحه
لونك تجهل اصوابه...اسأله و اسمع اجوابه...لا ترسمه ابدمه
يالراهب أترجاك لو ناوي تصوره...لا ترسمه بهذا الشكل مقطوع نحره
ارسم عيونه الساهرة من غير عبره...من ترسم الحاجب ارسمه ابلايه طبره
لا ترسمه إلـه...حين الذي تسأله
عليمن بالدمه اخضابه...اسأله و اسمع اجوابه...لا ترسمه ابدمه
أقسم عليك ابعيسه و القديسة مريم...أغسل من ارموشه التراب الجامد ابدم
لاحظ قبل لا تبتدي و بالرسمه تهتم...موضع جبينه بالحجر صابه و تهشم
لا ترسم الصورة...و اعظامه مكسورة
عن اللي بجبهته صابه...اسأله و اسمع اجوابه...لا ترسمه ابدمه
يالراهب و من قررت ترسم ولينه...شنهو اللي شاهدته نسألك نرد علينه
بعده يون من نحره لو بطل ونينه...لمن رسمته امغمضه لو مفتوحة عينه
و انشد من اوداجه...يا هو السلب تاجه
متدري اشسوه سلابه...اسأله و اسمع اجوابه...لا ترسمه ابدمه
يالراهب و راس السبط من ترسم اشفاه...هاي الشفاه الذابلة البس تذكر الله
ارسمها مبتسمه رغم صرختها بالآه...لا تنرسم زرقه و تبين شدة اضماه
ابعينك إذا شفته...متفطرة شفته
يراهب انشد أسبابه...اسأله و اسمع اجوابه...لا ترسمه ابدمه
لا ترسم الخد التريب اللي تعفر...بالك تلون شيبته باللون الأحمر
رجع ملامح صورته ووجهه التغير...تدري من الصحرة و شمسها صاير أسمر
شوفه و لتتعجب...من تنظره امترب
عقب ما تمسح اترابه...اسأله و اسمع اجوابه...لا ترسمه ابدمه
