ها يدنيه هم بعد ظلت عجيبة...هذي بت حامي الحمه و صارت غريبه
تحرسها الأجناب...لا مو بالحساب
هذي بت حامي الحمه و صارت غريبه
من عمت عينج يدنيه اشقد زغيره...الأميرة الآمرة صارت أسيره
امخدرة حيدر علي الما كو نظيره...صارت بولية نذل ما عنده غيره
بالصحاري حرمة الباري و سراجه...و الشمر حادي و يمشيها بمزاجه
بت قالع الباب...لا مو بالحساب
هذي بت حامي الحمه و صارت غريبه
ينضرب أروع مثل جان ابخدرها...لو مشت خل الولي حيدر ذخرها
و الحسن و حسين و الثالث قمرها...جف أبو فاضل يظل يمسح أثرها
ما يخلي كل أثر يبقه الجدمها...و الهوه ما يقدر ايحرك هدمها
هاي أم الحجاب...لا مو بالحساب
هذي بت حامي الحمه و صارت غريبه
امدللة حيدر و لا واحد وصلها...ظلها جان امحجب و محجوب ظلها
هسه يا وسفه الشمر يتباوع إلها...تنهضم و اتباوع الراس الكفلها
باليسر طول الدرب تتهامس الناس...عجبة زينب باليسر يتركها عباس
علمونه الأسباب...لا مو بالحساب
هذي بت حامي الحمه و صارت غريبه
شابت و درب السبي يكسر ضلعها...و التراب اعله الوجه غيّر وضعها
جم نهر أحمر رسم مجره دمعها...و الصعوبة من تون شامت سمعها
هذا يشتمها و هذاك ايصد عليها...هيه من سوط النظر تشقف بيديها
سوط النظر صاب...لا مو بالحساب
هذي بت حامي الحمه و صارت غريبه
مزقوا قرآن برض الغاضرية...و انرفع راسه برماح الجاهلية
زينب احجاب العرش راحت سبية...انقلاب اعله الرسالة الأحمدية
زينب الوكلّها الله بهالمهمه...لو يزيد الينتصر لو تمحي اسمه
و يصير الجواب...لا مو بالحساب
هذي بت حامي الحمه و صارت غريبه
ما حسب هذي يزيد ابن الدعية...ثورة أيتام بقيادة زينبية
ترجف الفرسان من دمعة رقية...زينب ابكل خطوة جانت حيدرية
ابجف عقيلة هاشم الراية العظيمة...و العروش انهارت ابدمعة يتيمة
ناتج هالمصاب...لا مو بالحساب
هذي بت حامي الحمه و صارت غريبه
من تشوف أم الخدر رغم الرزاية...تلقه أبو فاضل ابصفها و بيده راية
تلقه ذو الفقار وي زينب حماية...خيّم اجناح الوحي فوق السبايه
و بسهولة يا شمر تلفظ اسمها...ما دريت ابحيدرة و كافلها يمها
من بعد الأحباب...لا مو بالحساب
هذي بت حامي الحمه و صارت غريبه
روح أبو فاضل بقت تتبع ضعنها...ينسه قطع اجفوفه من ينظر متنها
دعوته يا رب بحق فاطم و ابنها...اختي زينب سالمة ردها الوطنها
يا إلهي بعهدتي آنا جبتها...من علي هاي الأمانة اتكفلتها
فدوه الها الرقاب...لا مو بالحساب
هذي بت حامي الحمه و صارت غريبه
