دخيلك لا تسافر يا علي

آنا لو عفتك تسافر من يظل بخيامي...كربله و دنياي ضدي حاربتني أيامي
يا علي بقاع المصايب تنذبح أحلامي...و الحرب دارات رحاها و انت جبدك ضامي
دخيلك يا أعز ناسي و هلي...دخيلك لا تسافر يا علي

انت كل اسنين عمري و تاج راسي العالي...يالأعز من روحي روحك يا حبيبي الغالي
من تموت اوياك يبني تندفن آمالي...و الله لو رحت و عفتني الصخر يبجي الحالي
دخيلك من يباري المحملي...دخيلك لا تسافر يا علي

ليلي بعدك ما أنامه لا تغمض عيني...للقلب هالليلة أضمك يا علي خليني
باجر ابيا عين أشوفك لو لطمت اجبيني...من أدورك بالضحايه محد ايدليني
دخيلك و آنا حرمة ابلا ولي...دخيلك لا تسافر يا علي

تدري بالطف و عذابه عندك انت اعلومه...أمك من العذب تبقه يا علي محرومة
باجر ابيا حال زينب من تفر للحومة...يلتف السوط ابمتنها بت علي المهضومه
دخيلك صوت زينب يعتلي...دخيلك لا تسافر يا علي

عمك العباس بالطف تنقطع جفينه...ما تظل بعيونه دمعة من اشوف اسكينه
اتصيح وينك يا بو فاضل ماي جودك وينه...و الخيام الفارقتها أحرقوها اعلينه
دخيلك يا حبيبي و كافلي...دخيلك لا تسافر يا علي