رحمه بالتشتم هواك...انظر التركض وراك
مو عليله و بيه حيل...عالسفر أقدر معاك
يالنويت اعله الرحيل و آنا أركض لك و أنوح...من خذت كل الخوات بويه خاوتني الجروح
تدري مو سهل الوداع بعدك أبقه ابلايه روح...حسين ثاني لو يصير قلي وينه و خل أروح
يا هي عدها ابهالأنام...أبو معصوم و إمام
وينه ألاقي لك بديل...و انت واحد لا سواك
صحت بويه بعالي صوت لو عليلة اشلون أصيح...و آنا لو ما بيه حيل ما ركضت و جني ريح
كلشي ما بيه و تشوف لا يغرك من أطيح...عثرت جدمي العباة قمت بس جفي جريح
مو مهم جرحي اليسيل...فكر بجرح الدليل
الهذا لو يحصل ضماد...قلي شيضمد هذاك
حته أثبت بالدليل علتي و المرض طاب...خذني أخدم بين ايديك بويه و أمرك مستجاب
أحمل بجتفي الرضيع خلها ترتاح الرباب...لو يفز امن المنام أقره آيات الكتاب
أسهر ابليك هدوء...و آنا أجهز لك وضوء
و بصلاة الليل أقول...و أندعي و أطلب رضاك
أقسم بإسمي عليك و اليذكرك بالبتول...لا تخليني بعذاب بويه و اغيابك يطول
خذني راح أتشافه بيك لو عليله اعلي تقول...الوردة لو ما تلقه ماي بيها شيسوي الذبول
شنهو أتنفس تريد...و الهوه خذته بعيد
دنيتي من هالنهار...ابعيني ظلمه ابلا ضواك
علم عندك خل يصير تره أول ما تغيب...علتي اترد من جديد تبدي أعراض النحيب
و الوضع يصبح خطير سكتتي و موتي قريب...تعرف العله و دواي و اللي ميعرفه الطبيب
اسم هالعله حنين...و الدوه اسمه حسين
شوقي ميجامل حياة...اشقد سهل عنده الهلاك
خاطرك أدري كسير لا أزيدك انكسار...شوف التحتم عليك إلك راجع هالقرار
أمري لله من تروح اشبيدي غير الإنتظار...و المدينة الجنة بيك أستغفر الله جنها نار
لون ما قبر الحبيب...بهالوطن يصبح غريب
ضيقّت صدري السماء...و الأرض تبجي بخطاك
قلبي ما أدري شجاه ايقلي هذا آخر لقاء...بس يردد ست حروف وحده اسمها كربلاء
اعلينه لو ويانه هاي ليش كلها دماء...تذبح من أهلي رجال بالسبي تبعث نساء
احساسي أتمنه يخيب...ما كو مسبية و خضيب
عمتي اترد بوقار...عمي بيده ايرف لواك
اوداعة الله يالمشيت بعد ما أظنك تعود...الوعد أتوقع يصير بويه بجنان الخلود
يا هو يسبق بالممات تنحفر لجله اللحود...اليوصل أول للجنان يهدي للثاني ورود
عقب أحلامي و طيوف...تالي تجمعنه الحتوف
نلتقي و اهناك أقول...عالسفر أقدر معاك
