ما بيه بعد رجعه...متلحق اتودعه
ضامي نزف دمه...مسلم يبو اليمه
ما بيه بعد رجعه...متلحق اتودعه
فوق القصر مسلم وقف يحسين ريت اتشوفه
من كوفة ايزيد الغدر يومي إلك بجفوفه
السياف يم جسمه وقف و الذبحه حد اسيوفه
اتمنيت يا سبط النبي تقصد إله و متعوفه
فوق القصر حاير...ذاك أبو طاهر
ساعة و رموا جسمه...مسلم يبو اليمه
ما بيه بعد رجعه...متلحق اتودعه
خانته الكوفة خانته يحسين ريت اتحضره
لا انت لا راعي العلم لا شاف اخوته ابكتره
هذا الأمير اللي أمس آلاف يمه اتنصره
لنه وحيد ابهالبلد حفروا بدربه حفره
بسمك هتف مسلم...للكوفة لا تقدم
ما ينحمل همه...مسلم يبو اليمه
ما بيه بعد رجعه...متلحق اتودعه
اتمنه يجي راعي العلم بالجود راده ايقصده
دم اعله خده و شفته يغسل اشفافه و خده
يرويه من قبل الذبح بالعطش يلهب جبده
بالكوفة ما واحد إله مسلم أخو ما عنده
وين القمر عنه...للكوفة يتعنه
اتمنه ابن عمه...مسلم يبو اليمه
ما بيه بعد رجعه...متلحق اتودعه
هذي حميدة طفلته شتقلها يحسين اشبيه
والدج ما يرجع بعد يا بنته لا تنتظريه
يحسين خاف ابهالخبر ريحانته اتموت اعليه
منتظرة إلها اويه الزمن و متألمه توصل ليه
ما تقصد الكوفة...ما تقدر اتشوفه
ما تقدر اتشمه...مسلم يبو اليمه
ما بيه بعد رجعه...متلحق اتودعه
ما بينك و بينه الأخو ابعيد الدرب يا مظلوم
لو ردت تتعنه إله ما توصل الكوفة ابيوم
ما وصل يحسين الخبر من الماي مسلم محروم
و الجسم من عالي القصر رامينه أشرار القوم
متحلق اتقبله...بس صوتك اتوصله
صدر الأرض ضمه...مسلم يبو اليمه
ما بيه بعد رجعه...متلحق اتودعه
يحسين قطعوا رقبته من عقب ما يرمونه
و بحبال جثته يالسبط ايربطوها و يسحبونه
راسه على راس الرمح و الدم جمد بعيونه
هالراس ليزيد الدعي فوق الرمح يهدونه
جثته بحبل تنجر...و راسه برماح الشر
ما كو أخو يمه...مسلم يبو اليمه
ما بيه بعد رجعه...متلحق اتودعه
