هالليله حيدر ضيّفه رب السمه

انفتحت الكعبة من أجل عقد الوله...هاي الفضيلة للصميدة امسجله

حامي الحمية إلـه أعظم منزله...من الله و رسوله و تعترف  كل المله

رب البرية العلي هوه قدمه

بيت العبادة نور هالليلة يشع...ينشق جداره و بيه حيدر ينوضع

لو غير حيدر يصدر اعليه المنع...و الباري يعرف حيدر و بيه مُطلع

نور و هداية علي حماي الحمه

هاي الكرامة لبو الحمله اتسجلت...كل الملايك للصميدة وقعّت

وبهالولادة اتبسمت و اتبشرت...و الحور نزلت للتحية قدمت

اتريد التهاني ابهالولادة اتقدمه

حيدر الآية و معجزة الكل البشر...بيه الكفاية و حصل من الله الفخر

تشهد بفضله علي و مجموع السور...هوه الحقيقة و العدالة البلدهر

حاضر الشدة و يحل أعظم موزمه

يا علي افرحنه بيك يا نور العدل...و من نور حبك هالمسية نكتحل

نلهج بإسمك يالصميدة و ما نمل...و بجاه نورك يرد يمك هالشمل

انت المحامي و انت للوادم حمه