حجّة الباري عْلَى السّطح ياخلق مطروح...بالشّمس مرمي والمسك من جسمه يفوح

سمّه الطاغي و قطّعت جبده اسمومه...و عْلَى اليريد اتساعده ذيج المشومه
نازح الدّار ابعيد عن عزوته و قومه...وقلبه من افراق الأهل والسّم مجروح

يا غيرة الله مهجة الزّهرا وحشاها...من غير سايه السّم تجرّع من اعداها
قوّض و بنت الطّاغيه نالت مناها...ومحّد حضرله ويل قلبي بطلعة الرّوح

فوق السّطح يومين والثّالث بلا مهاد...مطروح ابو الهادي وطِيبه غمر بغداد
ظل بالشّمس وين العشيره اُو وين لمجاد...وين الذي لَرْض المدينه ابْهمّته يروح

يوصل القبر المصطفى ويسجب العبره...وينعى الجواد ويكت دمعه فوق قبره
وينتحب ويعرّج على روضة الزّهرا...ايقلها يَزَهرا مهجتج بالشّمس مطروح

الله يَزهرا جم جنازه من بنينج...تبقى بلا اموارى و شفتيها ابعينج
و السبب كلّه مْن الذي سقّط جنينج...وَرّث علينا الهضم والحسرات والنّوح

فوق السّطح واحد ثلثتيّام خلّوه...اُو واحد على حماميل فوق الجسرجابوه
و امّا طريح الغاضريّه بخيل داسوه...وجم ولد يم حسين بارض الطف مذبوح

الله يَزَهرا اشحلّت ابقلبج مصايب...اشْسوَّت فجايع هالدّهر بَشبال غالب
وامّا المصيبه اللّي تخلّي القلب ذايب...سبي الحرم والرّوس فوق ارماحها تلوح