جعفر لسان الله سلالة بيت لَطهار...قاسى من اميّه ومن بني العبّاس لَمرار

كابد هضايمهم لسان الله النّاطق...حلاّل مشكلها و بيّنها الحقايق
عند العدو و المحب فاز ابلقب صادق...حيّز الشّيعه وعَز ذكرها ابكل لَمصار

جانت خفيّه و ضايعه ما بين لَحزاب...بالغير مخلوطه وعليها الذل جلباب
و نالت بجعفر صيت شيعة داحي الباب...و بين الملا صارت علَم و ابهامته نار

جم ألف كاتب تكتب علوم الشّريعه... ابمدرسة جعفَرنا و للعالم تذيعه
كل الملل و اسلام شيعه و غير شيعه... تفتخر بسمه و عاين و تعرف الآثار

مدرك من المنصور بيده ويعمل عْليه... يظهر المذهب و اليحبّه ينتمي ليه
و المدرسه غصّت من اعداه اُو مواليه... ابطب وشريعه وفلسفه نوّر الافكار

انفتحت مدينة علم بيت العلم والجود...كلّيّه ربّانيّه أيّدها المعبود
عُرْبي وتُرْكي وفارسي وافْرِنْج وهْنود...شق التّشيّع بسم جعفر كل لَقطار

شرّق وغرّب بالبسيطه اُو وَصل للصّين...بجهود جعفر ناصر القرآن و الدّين
كاشف ستار الذّل عن اوجوه لمسلمين...ناشر علوم المصطفى ومذهب الكرّار

وبس عاين المنصور جعفر مقصد النّاس...والخاص والعام انضرع له وهبّط الرّاس
عيشه تكدّر والقلب حل بيه وسواس...هذا وحجي الواشين شب ابْمُهجته نار

بكثر الفضايل والشّرف تكثر الحسّاد...و جعفر الصّادق بالمعالي دوم يزداد
و أهل البغي وصلت وشايتهم البغداد...و الفاجر المنصور غيظه ابْمُهجته ثار