قلبي من طبعه لحبابه يحن...قلبي
من يذكر الغالي يون...قلبي
عايش من الفرقه إبسجن...قلبي
لا تعاتب لك قلب فارق...حبيبه لا تلجمه بالملامه
و الجرح من طبعه يسأل عن طبيبه...ما كو أحله من السلامه
الموت و الفرقه سوه نفس المصيبه...دمعه تذبح إبتسامه
صعبه واحد يفارق خِلته...صعبه
من يشكي تنزل دمعته...صعبه
دمعاته نزلت عالوجن...قلبي
شرك خلوا بينه و بين الحبايب...كل قصدهم ما نجيهم
ما دروا محد يمنعه القلبه ذايب...و اليودهم يعتنيهم
آنا من حبيت أعرف هالعواقب...بعت روحي و مشريهم
عمري غالي و لجل حبهم رخص...عمري
ربحان إذا إلهم خلص...عمري
و بقاع حبهم يندفن...قلبي
إيطول جرحي لمن إتطول الليالي...يا حسرتي إشقد طويله
و الخليل الدوم الما بارح خيالي...يمته أوصل و أشتكي له
بالبقيع أحباب عندي و عندي...غالي ريت أظلن يمه ليله
عيني عطشانه رادت شوفته...عيني
كحلتها صارت تربته...عيني
ظلت تواسي بالحزن...قلبي
شوقي ياخذني البقيع أهل الكرامه...عله الصادق تبجي روحي
من تسلم دمعتي يرجع سلامه...من أسمعه يزيد نوحي
إجروح قلبه باقيه اليوم القيامه...لا تطيبي يا جروحي
قلبه بيه الجروح إمواصله...قلبه
يبجي المصايب كربله...قلبه
و يون مثل بنت الغصن...قلبي
يوم حرقوا داره نارين الذكرهن...الأوله نار أمه الزجيه
ذكر ذيج إضلوعها الظالم كسرهن...من عصرها هيه هيه
ثاني نار الحرقوا إعليهن خدرهن...سبو زينب آل أميه
ناره من زينب و من فاطمه...ناره
لليوم ظلت مضرمه...ناره
إبحربة جمرها منطعن...قلبي
خلص بس هم و قهر ظنوة الباقر...ما كو لحظه إبعمره راحه
يندب الضلعين بدموع النواظر...دومه حاضر للمناحه
ضلع بالمسمار و الثاني بحوافر...آه يقلبه إشقد جراحه
عينه تنزف مثل عين الجرح...عينه
بيها إنرسم راس إبرمح...عينه
مفتوح ما يغمض جفن...قلبي
ليش يا أهل الغدر تسقونه بالسم...هذا إمام الجعفريه
الغدر ماضيكم إبحاضركم تجسم...و الدوافع ناصبيه
صادق العتره إشجنه و قبره تهدم...هيه هاي الطائفيه
قبره باجر يعود و ينبني...قبره
من يرتفع ما يحني...قبره
يرجع بقيعه و ينسكن...قلبي
