جينه نهني حيدرة...بميلاد سبع القنطرة
نتعايد هدفنه...اتعنينه النجفنه
بميلاد سبع القنطرة
مولانه حامي الجار ما نهوه غيره
ما شفنه بالأصحاب واحد نظيره
اتعنينه له وفاد بأجمل مسيرة
في مولد العباس بدر العشيرة
عهد المودة انجدده...مثل النشيد انردده
بالفرحة هتفنه...اتعننيه النجفنه
بميلاد سبع القنطرة
غصبن عله الآلام نفرح بعدنه
ويه الفرح ما يوم نخلف وعدنه
لأرض النجف بأشواق زحفاً قصدنه
انقدم لبو العباس حبنه ووردنه
انزف له التهاني امعطره...كل الفرح نستشعره
المأوانه و كهفنه...اتعنينه النجفنه
بميلاد سبع القنطرة
هذا قمر عدنان ما كو مثاله
شعت عله العشاق صورة جماله
ثوب الوفاء اعليه لايق حلاله
الله أودع بيه روح البسالة
يوم الشجاعة مولده...جينه نهني والده
في حبه انشغفنه...اتعنينه النجفنه
بميلاد سبع القنطرة
ما يختلف عباس عن الصميدة
بالوفه و الإيثار ابنفس العقيدة
حين انولد شافوه رايته بإيده
ما توصل المعناه فكرة قصيدة
عباس راعي المشرعة...طاهر و طيب مرضعه
تيّاره جرفنه...اتعنينه النجفنه
بميلاد سبع القنطرة
مبروك ألف مبروك يا علي صحنه
شبلك عضيد حسين هذا فرحنه
بنوره الجميل ينور يضحك صبحنه
لمن نذكره ايطيب يلتم جرحنه
من بيتك الليلة ظهر...يا علي عالعالم قمر
خدامه انوصفنه...اتعنينه النجفنه
بميلاد سبع القنطرة
