فرحتنه و معانيها...اضوي يا زمن بيها
من صدر العرش ذرة...هذي فاطمه الزهرة
اضوي يا زمن بيها
غاص الخلود بهيبته اهوايه ابحور...و التقط هاي الذرة من بحر النور
و الوصف لو ما قدر يوصف معذور...أنسية أخذت من شمايلها الحور
ذرة و من بحر قدسي...توأم آية الكرسي
بيها اترتل الفطرة...هذي فاطمه الزهرة
اضوي يا زمن بيها
فاطمة السورة البيها تم الإيمان...و الما يرتلها هجر للقرآن
قالوا أغصان السدرة روح و ريحان...و فاطمة الثمرة الطيبة ابهالأغصان
هاي الثمرة قدسية...من الحضرة الإلهية
و بيها طابت السدرة...هذي فاطمه الزهرة
اضوي يا زمن بيها
سبحانه هاي الجوهرة رايدها...للأرض مستودع ضوه أوجدها
أم النبي و بت النبي بمولدها...و كل هذي سادات الضوه من عدها
و بيوم العطش الأكبر...بين اجفوفها الكوثر
اعليها اتأشر القدرة...هذي فاطمه الزهرة
اضوي يا زمن بيها
