توأم يا زمان...أمي و الحنان
أمي دعوتها نبي...و الحب وحيها
أمي من تدعي أشاهد السمه تنزل عليها كلها طيبه
و آني أنظر رحمة الله كلها تنزل فوق ايديها بيها هيبه
أمي مملوحة سوالف أدري الله يحب حجيها اشقد قريبه
بيها أشتم ريحة الله وهوه الله الوصه بيها هالحبيبه
تتمنه تصير...خبزة الكل فقير
أمي من تبجي الصخر...يبجي البجيها
الجنة تحت أقدام أمي و هاي من الله هدية يا عظمها
تبتسم حته ابحزنها و الهله عندها سجية من كرمها
أمي تدعي ابكل مسية للخلق مو بس إليه هذا همها
اشقد حنينة اتخاف حته من الهوه لو مر عليه و آنا يمها
خوفي من سنين...أفقد هالحنين
و الحياة بلايه أم...شنسوي بيها
يا خلق زينب تراني الما شفت غير الهضيمة لوعتني
اعليه جانت امي خيمة و آنا هسه ابلايه خيمة ضيعتني
هيه كل أم عدها رحمة ما كو مثل أمي رحيمة عجبتني
اشقد تحبني أمي لكن اتقدم اعليه اليتيمة عودتني
من رادت تموت...وصتني بسكوت
يمه لو شفتي يتيمه...ابجي عليها
مو مثل كل حرمة أمي أمي عند الله جبيرة بقد رحمته
الله خالقها أميرة بس تنام اعله الحصيرة تغفه حته
اشقد غنية أمي لكن تلبس اثياب الفقيرة تبجي سكته
علمتني الزعل أمه ما تظل براسه غيرة يا حسرته
و اليجرح يتيم...شيطانٍ رجيم
لعنة الله اعله السطر...وجه أم أبيها
علّمتني الغالي يرخص هيبة الحرمة بسترها الله ساتر
و الأخو من تمشي أخته بإيده خل يمسح أثرها خل يحاذر
المرأة من تصبر تجاهد احنه نتباهى بصبرها من تصابر
و التصابر عالمصيبة ربك ايضاعف أجرها يعني باجر
ترخص له الرقاب...خيط امن الحجاب
حته لو برض الغرب...ذبحوا وليها
ما تموت الأم لونها ربت أبطال و غياره نفرح إلها
و التضحي ابدم إبنها عدها وي الله تجاره الجنة إلها
الخسارة الباع دينه المات عالحق مو خساره يعرف إلها
الما يوقر أمه حتماً ينسلب منه وقاره اصفن إلها
يالتسمع نداي...ربي الثاني هاي
كل صباح و كل مسه...قبّل إيديها
أمي تركت لي حصيرة سبحة طين و كل حزنها و دنية ظلمه
أمي بس هالثوب عدها أسود و سووه جفنها و الله هضمه
اشما أشوف الباب أذكر وقعة أمي و موت إبنها محسن إسمه
ابيا ذنب يا ناس أمي ماتت و أزرق جفنها آه ييمه
حرموني المنام...أولاد الحرام
و أدعي يا رب السمه...وديني ليها
أمي وصتني وصية و دمعة نزلت منها حمرة اشهالوصيه
من يظل حسين بالطف وحده محد ينصره راح أخيه
يَّمه قدمي له جواده يَّمه بوسيه اعله صدره هاي إليه
صيحي يَّمه يالزجية من يحز الشر نحره يالسبيه
يبنيتي أريد...بوسيه بالوريد
بيه أثر بوسة علي...و بوسة نبيها
