العمره ما شايل اجروح...لا يلوم الذي اينوح

آنا ودعت الحسين...عفته بس عفته مذبوح

آنا اخت البلذبح قلبه عليه...قلبه قبل اخيامي نيرانه سريه

آنا أخت القايل ابهاي الرزيه...الموتة سهلة و الصعب زينب سبيه

يا هي مثلي من الناس...قلب أخوها ابهالإحساس

حته و بقطعة الراس...أخته عن باله متروح

الخنسة لو ناحت صخرها يعذروها...آنا بس اليمنعوها اتنوح أخوها

الشمر من يسمع بجي ايقول اضربوها...حرمة و امتون بضربهم ورموها

الزجر ما قصر اوياي...ابسوطه و يسكت ابجاي

و تترس العبره عيناي...و الدمع سكته مسفوح

المثل أخويه اشويه لو أدمي المحاجر...حته راسه و هوه ميت بيه مشاعر

خل أسولف من بعد قطع المناحر...اشلون راسه ايفكر بحالي و يساهر

ابكربله شفته مقطوع...لاجن الحالي مفجوع

ينظر و يذرف ادموع...قلته يا خويه مسموح

جسم أخويه ابكربله خليته عاري...و راسه ما جنت أدري وين و الله داري

من دخلت الكوفه لنه بإنتظاري...عالرمح شفته و عليَّ اسود نهاري

شفته و المحمل ايميل...و اضربت راسي بالويل

دمي ظل يجري و يسيل...حقي لو فاضت الروح

أمضي للشام و مضه الراس اعله رمحه...أنظره ابدمعي و أحس كل نظرة ذبحه

دمه يقطر و الهوه يسفي اعله جرحه...و آنا كل خوفي رقية لا تلمحه

جنت أسليها و اتنام...خوفي من نوصل الشام

اتشوف أبوها بالأحلام...بالطشت منحره ايلوح

الراسه أذكر موقف ايظل بفؤادي...ركز رمحه و عجزت اتشيله الأيادي

عالسبب قاموا يسألون الأعادي...و علي جاوب طفلة تاهت بالبوادي

قلهم ابصوت الونين...شوفوا نظرات الحسين

تشبح و تتجه وين...ناظره البنته مشبوح