يا دواهي الزمن...أدري بالمعضله
يجري دم الحسن...من نهر كربله
حرق نيران الخيام الوصفوها
و المناحر عالرماح العلقوها
و الجفوف العلفرات القطعوها
كلها وي جبد الحسن تنزف لقوها
و إنكشف للعلن...جوهر المسأله
يجري دم الحسن...من نهر كربله
الحسن يدري بكربله و لوعة ألمها
قبل لا تحترق شم ريحة خيمها
و آل هاشم يدري بالطف يجري دمها
عالرماح الروس ما تخلف قسمها
يدري يتيسرن...حرم بالقافله
يجري دم الحسن...من نهر كربله
من فتح عينه الحسن بعيونه دمعه
و بكسر ضلع أمه جن مكسوره ضلعه
أمه شمعه و ما بقت بالبيت شمعه
و اليتيم اليفقد أمه من يسمعه
من تمره المحن...يا هو يتكفله
يجري دم الحسن...من نهر كربله
يذكر أمه اشلون من مدت له اديها
من لهيب النار ما يقدر يجيها
اشلون ينساها المصيبه العاش بيها
و جان يم الباب من دفعوه عليها
شاف نار الفتن...محسن و قاتله
يجري دم الحسن...من نهر كربله
شاف موت المحسن بحقد الخليفه
العاف حكم الله و فرض حكم السقيفه
شاف كل غدر الأيادي المو نظيفه
الفضلت ملعون عالعتره الشريفه
ضد علي ابلا رهن...غاية المشكله
يجري دم الحسن...من نهر كربله
ابطبرة المحراب من ودع حبيبه
صاح الله يعين زينب عالمصيبه
اشلون بالطف تبقه مسبيه و غريبه
اتشوف أخوها حسين بالجثه السليبه
عالثره ابلا جفن...راسه ما نّزله
يجري دم الحسن...من نهر كربله
ما نزع راس الحسن تاج الإمامه
و لا تنازل عن عرش جده و مقامه
مثله حاكم ما شفت حارب منامه
خاف ظلت جايعه ابطون اليتامه
ابعينه ما مر وسن...لجل ناسه و هله
يجري دم الحسن...من نهر كربله
لا تلوم الحسن لو عاف السياسه
ألف لون ايشوف قام اوجوه ناسه
الحسن ما دور عله أفواج و حراسه
و لا مشه و رافع عاليمشون راسه
بالتراب اندفن...بس مقامه اعتله
يجري دم الحسن...من نهر كربله
