قبلة وجودي...جنة خلودي
كوثر ورودي...يا زهراء
آية كتابي...للرب جوابي
ساعة حسابي...يا زهراء
شدر خاتم محمد فاطمه الزهره
و الخاتم غلاته ابقيمة الشدره
بإسمها أعرج محمد للعرش و أسره
امن البيت الحرام القبة الصخره
يفخر بإسمها...أسره بعلمها
يا دمه دمها...يا زهراء
جوهر وفاءه...كل كبرياءه
دعوة رجاءه...يا زهراء
*
قبل لا عيسه نسمع صوت ناقوسه
قبل شق البحر بالمعجزة الموسه
جانت بالعرش شجرتها مغروسه
خلق للجنة منها الباري طاووسه
قبل الخليقه...هيه الحقيقه
للحق طريقه...يا زهراء
نور البداية...سور النهاية
باب الولاية...يا زهراء
لجل فاطم رفع ربك سماواته
لجلها ابلا جدل نزلت رسالاته
هيه أركان دينه و كل عباداته
و ابحبها المقّدس تمت آياته
آية صلاته...جنة جناته
عذبه و فراته...يا زهراء
منهل خصاله...معدن كماله
نور الجلاله...يا زهراء
سر رب الخليقة الواجب التقديس
البيه ربك أمر ينقل عرش بلقيس
العادت فاطمه ابلا شك جنود إبليس
و احذر بالنساء اتقيسها امن اتقيس
هيه الوحيده...لجل العقيده
عاشت شهيده...يا زهراء
هاي الكريمه...هاي الحليمه
هاي العظيمه...يا زهراء
هاجر قدمت للمذبح إسماعيل
و اتبدل كبشها و قبلت التبديل
و فاطم قدمت كل عترة التنزيل
ضحايه و مثلوا بأجسادهم تمثيل
بالطف ضحايه...أهل الهدايه
بيها الكفايه...يا زهراء
دم المناحر...هز المشاعر
هاي المفاخر...يا زهراء
كفاها امن الفخر تفاحة الرحمان
محمد بيها باهل كل أهل نجران
هيه المعجزة المذكورة بالقرآن
و المرأة الوحيدة الهانت الشيطان
علت وجوده ...كسرت قيوده
رفضت حدوده...يا زهراء
هانت مقامه...ردت كلامه
شهدت خصامه...يا زهراء
سارة و آسية و مريم خدم عدها
و ربها بآية التطهير خلّدها
فاطم عالبشر شّرفها والدها
يضد الله و محمد كلمن ايضدها
و الحاربوها...و الخالفوها
غدروا بأبوها...يا زهراء
خلفوا عهدها...ذبحوا ولدها
خانوا وعدها...يا زهراء
ماتت بالغضب عالما رحم بيها
سلب حقها و رفض من حقها ينطيها
وين ايروح منها الخان باريها
خالد و بسقر كلمن يعاديها
كسروا ضلعها...منعوا دمعها
طفّوا شمعها...يا زهراء
سرها و صبرها...مخفي ابقبرها
ضد الغدرها...يا زهراء
