يُمّه يا زينب عزيزه دمعة اعيونج
ينسطر هاليوم وجهي و باجر امتونج
آنا بالسطره أمتحن...و انتي بسياط المتن
يُمّه زينب من سطر وجهي بيمنته
سب خديجه و سب رسول الله سمعته
قلت له يا ظالم تره ضلعي كسرته
انت جتالي و جنيني هم قتلته
قلي من بضعة محمد ما خلص ثاري
يعني زينب استعدي ايعينج الباري
سطره أدمت لي الجفن...و انتي بسياط المتن
هذي أول جرأة عالباري و حبيبه
أدري من هالباب تبدي كل مصيبه
يمه زينب انتي من هسه غريبه
جن أشوفج و انتي مسبيه و سلبيه
يحرق اخيامك يزينب الحرق بابي
و الذبح محسن ييمه يذبح أحبابي
قلبه ميت ما يحن...و انتي بسياط المتن
لا تعتبين اعله حماي الضعينه
آني سطروني و علي سيفه بيمينه
ينهضم عباس لو صحتي انسبينه
صيحي يا حيدر علي بويه انولينه
لو قصدتي اعله الشريعة و انتي ملهوفه
شيلي سهم الصاب عينه و قبلي اجفوفه
سامحيه يم الحزن...و انتي بسياط المتن
انتي للمحسن بده يكثر ونينج
باجر ابطف كربله الله يعينج
من يسل سيفه الشمر و ينادي وينج
امن القفه يذبح حسين إقبال عينج
من يحز الراس يُمه جن يحز راسي
و آنا وي أنفاس ابني أقطع أنفاسي
ابني عاري ابلا دفن...و انتي بسياط المتن
و الأخذ مقيود حمّاي الحميه
باجر ايقودج يبت حيدر سبيه
آني يهضمني تره اليهضم رقيه
و القطع خنصر حسين ايقطع ايديه
ون الحسين اعله ضلعي يجرن ادموعه
باجر تسمعين بالطف كسرت اضلوعه
صدري باجر ينسحن...و انتي بسياط المتن
احتمت بالباب امج من اجوها
بيمن اتلوذين و الخيمة احرقوها
ما كو قبلج هاشميه سّلبوها
ذبحوا اخوتها عله الماي و سبوها
بيمن اتلوذ الغريبه الحرقوا اخيمها
و الكفلها اعله الشريعه و الشمر يمها
يشفه جرحج ما أظن...و انتي بسياط المتن
يُمه كلكم يمي و أشعر آني وحدي
انتي و حسين و حسن و الوالي عندي
اشلون و انتي اعله الهزيله و شمر يحدي
للسبي ناده يمسلوبه استعدي
عالرمح راس الكفاله ايعاين الحالج
من عقب وجه أبو الأكبر حرمله إقبالج
صعبه ليلج من يجن...و انتي بسياط المتن
