يُمّه...لحظة اوادع و سفر
يُمّه...ضلعج و قلبي انكسر
يُمّه...مني شيريد الدهر...يُمّه
يُمّه لو رحتي أظل ابلايه خيمه
يا حنينه و ساعة افراقج أليمه
يا هضيمه و يا هضيمه و يا هضيمه
بعدج اتقول الخلق زينب يتيمه
ردّي...لا تخليني ابجرح
ردّي...لحظة اواعج ذبح
ردّي...أبقه ليله ابلا قمر...يُمّه
يُمّه مخنوق الهوه و الدنيه ظلمه
و عطرج بدخان باب الدار أشمه
صدمت البنت اعله أمها بيها هضمه
اتعود إلساني اعله كلمة يُمّه يُمّه
ويلي...عفتي زينب للحزن
ويلي...ليلي ظالم من يجن
ويلي...نايمه ابعيني السهر...يُمّه
جلمة الأم عاطفة و الحب نزفها
جلمه بس اليفقد الأم ايعرفها
طلعت أمي و روحي من كهفها
صحت ليش القاع ربي ما خسفها
و الله...أنظر الحايط و أون
و الله...عادت الفاقد يحن
و الله...آني دلالي انفطر...يُمّه
كل دموع العالم الأجلج قليلة
و الحياة ابلايه أمي مستحيله
مره أنظر لخوتي و دمعي أسيله
مره أصرخ ليش يا حامي دخيله
بويه...أمي مكسورة ضلع
بويه...يصرخ بعيني الدمع
بويه...وسفه حيدر ما حضر...يُمّه
أنظر المسمار و يذّكرني بيها
حسين من يبجي يذّكرني ببجيها
اشقد ثقيلة و انطبقت عليها
ابلا حجاب الزهرة و اتغشت بيديها
شفته...من وقع منها الطفل
شفته...من سطر خدها النذل
شفته...خد رسول الله انسطر...يُمّه
الحرق بابج تره يرجع عليه
يحرق اخيامي عليّ بالغاضريه
و السطر وجهج يبت سيد البريه
يضرب امتوني و يوديني سبيه
وحدي...ظهري بالطف ينكسر
وحدي...يحدي بضعوني الشمر
وحدي...آنا أموت من القهر...يُمّه
من شفت حيدر بجه الحالة اوليده
جن أشوف حسين بديار البعيده
يُمّه شيقول اليموت ابنه اعله إيده
ينظر ابعينه السهم يقطع وريده
يرجع...شايل ابنه الخيمتي
يرجع...صاحت أمه الصيحتي
يرجع...ابنه مقطوع النحر...يُمّه
