أضف الموضوع
الشاعر وسام الشويلي - 01/12/2015م - 8:51 م | عدد القراء: 5023
جنه أحباب ابنفس الدار...و اليوم انمركم زوار
ردينه ابدمع الأيتام...جبنه اويانه اجروح الشام
عله أطراف الجرح نمشي اجينه بروح مشتاقه
تحن اقلوبنه اعليكم مثلما حنّت الناقه
من يوم اهدعش لليوم نحسب يمته نتلاقه
عجيبه اللي سكن بالروح نقدر نحمل افراقه
فرقتكم من طعم الموت...جثه انسير ابلا تابوت
و اعيون اليفقد متنام...جبنه اويانه اجروح الشام
جنه أحباب مجتمعين مثل الجسد ويه الروح
هسه اشلون نحملها زياره انزوركم و انروح
اليزور ايجيب نذره اوياه و احنه اويانه جبنه اجروح
أول حاجه جبناها راس امن القفه مذبوح
آخر يوم النه ابعاشور...فارقنه و ردينه انزور
حسرتنه ابطول الأيام...جبنه اويانه اجروح الشام
سوالف بالقلب كثره صعب لو ردنه نحجيها
أبد ما تنتهي القصه إذا بالدمعه نبديها
رقيه اشلون حالتها لونك تسأل اعليها
تجر حسرتها بفراقك مثل جرت تراجيها
كل لحظه اتناشد يحسين...وين الوالد سافر وين
منك شافت بس أحلام...جبنه اويانه اجروح الشام
رقيه آثار دمعتها على راسك يبو اليمه
عله اشفافك يوالدها عطر و الروح تشتمه
أذكر راسك اتحضنه ابحذر و اتقلي يا عمه
أظن حاضنته لو جرحه جبير و دمعتي اتلجمه
طفله و ذابحها الإحساس...ماتت بالحسره اعله الراس
ما تحمل هاي الآلام...جبنه اويانه اجروح الشام
يخويه اهوايه خجلانه اجيت ابدمعتي أتعذر
راسك ما قدرت أحميه من ايد الظلم و الشر
أقل إلهم اضربوني و اتركوا اشفاف أبو الأكبر
يقلولي عله اعنادج نحرك بالعصه المنحر
كل ضربه التوقع عالراس...أبجي و أصرخ يا عباس
أنظر ألقه ابعينه اسهام...جبنه اويانه اجروح الشام
وي عباس شرد أحجي و إذا ندهنه ما يقعد
ضعني اشلون من دونك لديار المدينه ايرد
الينشد عن خدر زينب أقله أرجوك لا تنشد
خدري وي قمر عدنان يمه النهر متوسد
جانت ذيج الرايه احجاب...من طاحت شافونه أجناب |
|
